You are here

சாயிஷாவுடன் நடனம் ஆடப் பயந்த ஆர்யா

சாயிஷாவுடன் ‘கஜினிகாந்த்’ படத்தில் நடித்து வரும் ஆர்யா, அவருடன் நடனம் ஆட மிகவும் பயந்திருக்கிறார். ஆர்யா=சாயிஷா ஜோடியாக நடிக்கும் படம் ‘கஜினிகாந்த்’. சந்தோஷ் பி.விஜயக்குமார் இயக்கியுள்ள இந்தப் படத்தை ‘ஸ்டுடியோ கிரீன்’ சார்பில் கே.ஈ.ஞானவேல்ராஜா தயாரிக்கிறார். பாலமுரளி பாலு இசை அமைத்துள்ள இந்தப் படத்துக்குப் பாலு ஒளிப்பதிவு செய்துள்ளார். இந்தப் படத்தின் பாடல் வெளியீட்டு விழா நடந்தது.

படக்குழுவினர் உட்பட பலர் பங்கேற்ற இதில் ஆர்யா பேசியபோது, “சாயிஷா ‘வனமகன்’ படத்தில் நன்றாக நடித்திருந்தார். அதேசமயம் அசத்தலாக நடனம் ஆடி இருந்தார். எனவே, இந்த ‘கஜினிகாந்த்’ படத்தில் அவருடன் பாடலுக்கு நடனம் ஆடப் பயந்து கொண்டிருந்தேன். நானும் சாயிஷாவும் நடனம் ஆடிய பாடல் காட்சி பேங்காங்கில் படமாக்கப்பட்டது. ஒரு வழியாக கஷ்டப்பட்டு ஆடினேன். “பின்னர் சென்னை வந்து பாடலைப் போட்டுப் பார்த்தபோது ‘சாயிஷா பயங்கரமாக நடனம் ஆடி இருக்கிறார். நீங்கள் பக்கத்தில் சும்மா நிற்கிறீர்கள்’ என்று சொன்னார்கள். அந்த அளவுக்கு இந்தப் படத்திலும் சாயிஷா பிரமாதமாக நடனம் ஆடி இருக்கிறார். தமிழ் அவருக்குத் தெரியாது. இருந்தாலும் தமிழ் வசனங்களை மனப்பாடம் செய்துகொண்டு நடிப்பார். அந்த அளவுக்கு நடிப்பில் அக்கறை கொண்டவர்,” என்று பாராட்டினார் ஆர்யா.