1எம்டிபி விவகாரம்: முன்னாள் வங்கி அதிகாரிக்கு 54 மாதம் சிறை

மலேசிய அரசாங்க முதலீட்டு நிறுவனமான ‘1எம்டிபி’யில் இடம்பெற்றதாகக் கூறப்படும் பில்லியன்கணக்கான டாலர் பண முறைகேடு தொடர்பில் கள்ளப் பணத்தை நல்ல பணமாக மாற்ற உதவியது, பண மோசடி ஆகிய குற்றங்களுக்காக முன்னாள் பிஎஸ்ஐ சிங்கப்பூர் வங்கி அதிகாரியான இயோ ஜியாவைக்கு சிங்கப்பூர் நீதிமன்றம் 54 மாதச் சிறைத் தண்டனை விதித்துள்ளது. இதுநாள் வரை, 1எம்டிபி விவகாரம் தொடர்பில் ஒரு சிங்கப்பூர் நீதிமன்றத்தால் விதிக்கப்பட்ட தண்டனைக் காலத்தில் ஆகக் கூடியது இதுதான். தன் மீதான இரு குற்றச்சாட்டுகளை ஒப்புக்கொண்டார் 34 வயதான இயோ. தண்டனை விதிக்குமுன் அவர் மீதான மேலும் எட்டுக் குற்றச்சாட்டுகளும் கவனத்தில் கொள்ளப்பட்டன.