மலேசியாவில் பரபரப்பை ஏற்படுத்திய 4D எண்கள்

கோலாலம்பூர்: மலேசிய முன்னாள் பிரதமர் நஜிப் செவ்வாய்க்கிழமை கைது செய்யப்பட்டதைத் தொடர்ந்து 5753, 2469 ஆகிய 4D லாட்டரி எண்கள் இரண்டே மணி நேரத்தில் மலேசியா முழுவதும் விற்றுத் தீர்ந்தன. 5753 என்ற எண், 'ஊழலுக்கு கைது செய்யப்படுவது' என்பதை குறிக்கும் வகையில் லாட்டரி எண் எடுப்பவர்கள் மத்தியில் பயன்படுத்தப்பட்ட ஒரு சிறப்பு 4D கையேட்டை அடிப்படையாகக் கொண்டது. அதோடு, 2469 எனும் எண் மலேசிய ஊழல் தடுப்பு ஆணைய அதிகாரிகளால் நஜிப் கைது செய்யப்பட்டு அழைத்துச் செல்லப்பட்ட காரின் பதிவு எண்ணாகும். "லாட்டரிச் சீட்டுகள் வாங்க காலை எட்டு மணி முதல் நீண்ட வரிசையில் காத்திருந்த பலர் 5753, 2469 எண்களை எடுக்கப் போட்டி போட்டுக்கொண்டு விரைந்தனர்," என லாட்டரி கடை நடத்தும் லாய் என்பவர் தெரிவித்தார். லாட்டரி எண் நிறுவனங்களான மெக்னமின் ஓர் இலக்க எண்கள் 8,000 ரிங்கிட்டிற்கும் டோட்டோவின் ஓர் இலக்க எண்கள் 5,000 ரிங்கிட்டிற்கும் விற்கப்பட்டன.