You are here

சொந்த மண்ணில் மேன்யூ படுதோல்வி

மான்செஸ்டர்: மான்செஸ்டர் யுனைடெட் காற்பந்துக் குழு அதன் சொந்த விளையாட்டரங்கத்தில் ஸ்பர்ஸ் குழு விடம் நேற்று 3=0 எனும் கோல் கணக்கில் படுதோல்வி அடைந்தது. யுனைடெட்டின் தற்காப்பில் உள்ள குறைபாடுகளையும் பலவீனங்களையும் ஆட்டத்தைப் பார்த்த அனைவரிடமும் ஸ்பர்ஸ் காட்டியது. ஸ்பர்ஸ் குழுவுக்காக இரண்டு கோல்கள் போட்டு லூக்கஸ் மோரா தமது அணியின் வெற்றிக்கு வித்திட்டார். முற்பாதி ஆட்டத்தில் கோல் ஏதும் போடப்படவில்லை. இடைவேளையின் போது இரு குழுக்களும் சமநிலையில் இருந்தன.

ஆனால் பிற்பாதி ஆட்டத்தில் நிலைமை மாறியது. ஏற்கெனவே கடந்த வாரம் நடைபெற்ற ஆட்டத்தில் பிரைட்டனிடம் யுனைடெட் 3-2 எனும் கோல் கணக்கில் வீழ்ந்திருந்தது. அதைக் கருத்தில் கொண்டு தமது அணியில் சில மாற்றங்களைச் செய்தார் யுனைடெட்டின் நிர்வாகி ஜோசே மொரின்யோ. தற்காப்பு ஆட்டக்காரர்கள் எரிக் பெய்லியும் விக்டர் லிண்டலோஃபும் நேற்றைய ஆட்டத்தில் களமிறங்க வில்லை. மூன்று தற்காப்பு ஆட்டக்காரர்கள் கொண்ட வியூகத்தை மொரின்யோ கையாண்டார். புயல் வேகத் தாக்குதல்களை நடத்தும் ஸ்பர்ஸ் குழுவிடம் இந்த வியூகம் எடுபடவில்லை. பிற்பாதி ஆட்டம் தொடங்கி ஐந்து நிமிடங்களில் ஸ்பர்ஸின் முதல் கோலை ஹேரி கேன் போட்டார். கார்னர் வாய்ப்பு மூலம் வந்த பந்தை தலையால் முட்டி கோலாக்கினார் கேன். இந்த அதிர்ச்சியிலிருந்து யுனைடெட் மீள்வதற்குள் அடுத்த இரண்டு நிமிடங்களில் ஸ்பர்ஸின் இரண்டாவது கோல் போடப்பட்டது.

ஸ்பர்ஸின் இரண்டாவது கோலைப் போட்டுக் கொண்டாடும் லூக்கஸ் மோரா (நடுவில்). படம்: ராய்ட்டர்ஸ்