படிப்புக்கு இடையே நடிக்கும் மாளவிகா

'குக்கூ' படத்தின் வெற்றிக்குப் பிறகு அதன் நாயகி மாளவிகா நாயர் பற்றி எந்தத் தகவலும் வெளியாகவில்லை. நல்ல நடிகை என்று பெயரெடுத்தவரை அடுத்த படத்தில் பார்க்க முடியவில்லை என்பதில் ரசிகர்களுக்கும் வருத்தம் இருக்கவே செய்தது. இந்நிலையில் மீண்டும் ஒரு தமிழ்ப் படத்தில் நடிக்கிறாராம் மாளவிகா. இடையில் என்ன செய்து கொண்டிருந்தார் என்கிறீர்களா? "வேறென்ன... படிப்புதான். எங்கள் குடும்பத்தில் எல்லாரும் படித்து நல்ல உத்தியோகத்தில் இருக்கிறார்கள். எனக்கும் படிப்பில் ஆர்வம் அதிகம். நான் ஏற்கெனவே நடித்த படங்கள் அனைத்தும் கோடை விடுமுறை நாளில் நடித்தவைதான். "'குக்கூ' படம் பத்தாம் வகுப்பு விடுமுறையின்போது நடித்தது. அடுத்து மேல்நிலைப் பள்ளியில் சேர்ந்ததால் நடிப்புக்கு இடைவெளி விட்டு படிக்கச் சென்றுவிட்டேன். தற்போது கோடை விடுமுறை என்பதால் மீண்டும் படத்தில் நடிக்கிறேன்," என்கிறார் மாளவிகா. இனி கல்லூரிப் படிப்பு முடியும் வரை விடுமுறை நாட்களில் நல்ல கதையம்சம் உள்ள படங்களில் நடிக்கத் தீர்மானித்துள்ளாராம்.