விஜய் படத்தின் படப்பிடிப்பை ஜார்ஜியா நாட்டில் நடத்த உள்ளனர். படக்குழு அந்நாட்டுக்குப் பயணம் மேற்கொண்டுள்ளதாக தகவல் வெளியாகி உள்ளது.
'தளபதி 65' படத்தை நெல்சன் திலீப்குமார் இயக்குகிறார். விஜய் ஜோடியாக பூஜா ஹெக்டே நடிக்கிறார். மிகுந்த பொருட்செலவில் இப்படம் உருவாகிறது.
முக்கியமான காட்சிகளை ரஷ்யாவில் படமாக்கத் திட்டமிட்டிருந்தனர். இந்நிலையில் பல நாடுகளில் கொரோனா கிருமித்தொற்று மீண்டும் அதிகரித்து வருகிறது. எனவே, ரஷ்யாவில் படப்பிடிப்பை நடத்துவது தடைபட்டுள்ளதாம்.
இதையடுத்தே ஜார்ஜியாவில் படப்பிடிப்பை நடத்த முடிவு செய்துள்ளார் இயக்குநர் நெல்சன். எனினும் கடந்த வாரமே ஜார்ஜியா செல்ல இருந்த பயணத் திட்டம் விஜய்க்காக மாற்றி அமைக்கப்பட்டது.
தமிழக சட்டமன்றத் தேர்தலில் வாக்களித்த பிறகே வெளிநாடு கிளம்பவேண்டும் என்றாராம் விஜய். தேர்தலில் தவறாமல் வாக்களிக்கும் வழக்கம் உள்ளவர் என்பதால் படக்குழுவும் காத்துக் கிடந்தது. இந்நிலையில், நேற்று முன்தினம் தனது ஜனநாயகக் கடமையை நிறைவேற்றிய கையோடு பயணத்துக்குத் தயாராகி விட்டார் விஜய்.
"பனிப்பிரதேசமான காஷ்மீரில்தான் சில காட்சிகளைப் படமாக்க திட்டமிட்டிருந்தோம். எனினும் காஷ்மீரில் படப்பிடிப்பு நடத்தினால் சில சிக்கல்கள் எழக்கூடும் என அங்குள்ள ஏற்பாட்டுக் குழுவினர் தெரிவித்தனர்.
"எனவே, தேவையின்றி எந்தச் சிக்கலிலும் சிக்கிவிடக்கடாது என்பதால் காஷ்மீரைத் தவிர்த்து விட்டோம். காஷ்மீரைப் போலவே ஜார்ஜியாவிலும் பனிக்கட்டிகள் சூழ்ந்த பல்வேறு பகுதிகள் உள்ளன. எனவே, படப்பிடிப்பு தொடர்பான திட்டங்களில் சில மாற்றங்களைச் செய்துள்ளோம்.
"குறைந்தபட்சம் 10 நாட்கள் முதல் அதிகபட்சமாக இம்மாத இறுதி வரை தளபதி 65 படத்தின் படப்பிடிப்பு ஜார்ஜியாவில் நடைபெறக்கூடும்," என்று படக்குழு தரப்பில் தெரிவிக்கப்பட்டுள்ளது.
இதற்கிடையே இப்படத்தில் யோகிபாபுவும் இணைந்துள்ளார். விஜய்யின் முந்தைய இரு படங்களிலும் நடித்துள்ளார் யோகி.
அதை மனதில் வைத்திருந்து 'தளபதி 65' படத்திலும் அவர் இடம்பெற வேண்டும் என விரும்பினாராம் விஜய்.
அதையடுத்து யோகிபாபுவுக்கு ஓரளவு முக்கியத்துவம் தரும் வகையில் ஒரு கதாபாத்திரத்தை உருவாக்கி உள்ளாராம் நெல்சன்.
யோகிபாபு இப்படத்தில் நடிக்கவேண்டும் என 'சன் பிக்சர்ஸ்' நிறுவனமும் விரும்பி உள்ளது.
இதை அறிந்து உற்சாகம் அடைந்த யோகிபாபு இம்முறை சிறிது நேரம் திரையில் தோன்றினாலும் விஜய் ரசிகர்களைக் கவரவேண்டும் எனும் முனைப்புடன் இருப்பதாகத் தகவல்.