இணையவாசிகளை ஈர்க்கும் 'கொரோனா' காணொளி; வியட்னாமின் வெளியீடு
கொரோனா கிருமித்தொற்றுப் பரவலைச் சமாளிக்கும் வழிமுறைகளை விளையாட்டாக எடுத்துக்காட்டும் விதத்தில் வியட்னாமிய மொழியில் காணொளி ஒன்று வெளியாகி இணையத்தில் பலரது கவனத்தையும் ஈர்த்துள்ளது.
‘டிக்டோக்’ காணொளிச் செயலியில் வெளியான இந்தக் காணொளி 2 மில்லியனுக்கும் அதிகமானோரின் கவனத்தை ஈர்த்துள்ளது.
பாடகர்கள் எரிக், மின் ஆகியோர் பாடிய “Jealous” எனும் பாப் இசைப் பாடலின் (“Ghen” எனும் வியட்னாமிய பாடல்) ராகத்தில் அமைந்துள்ள “push back the virus Corona, Corona” எனும் பாடலை உயிரோட்டக் காணொளியாக வியட்னாம் சுகாதார அமைச்சு வெளியிட்டுள்ளது.
தனிநபர் சுகாதாரப் பழக்கவழக்கங்களான கைகளை முறையாகக் கழுவுதல், வேலையிடங்களைத் தூய்மையாக வைத்துக்கொள்ளுதல், சுற்றுப்புறத்தைத் தூய்மையாக வைத்துக்கொள்ளுதல், கூட்டமான இடங்களுக்குச் செல்வதைத் தவிர்த்தல், முகத்தைக் கைகளால் தொடுவதைத் தவிர்த்தல் போன்றவற்றை வலியுறுத்தும் இந்தக் காணொளி கொரோனாவின் பிறப்பிடம், அது எவ்வளவு கொடியது என்பதையும் விவரிக்கிறது.
வியட்னாமில் இதுவரை 16 பேர் கொரோனா கிருமித்தொற்றால் பாதிக்கப்பட்டுள்ளதாகக் கூறப்பட்டாலும் அவர்கள் அனைவரும் குணமடைந்து வீடு திரும்பிவிட்டதாகவும் கூறப்படுகிறது.
சீனாவுடன் எல்லையைப் பகிர்ந்துகொள்ளும் வியட்னாம், கொரோனா கிருமித்தொற்று பரவலுக்கு எதிராக கடுமையான நடவடிக்கைகளை எடுத்தது. ஒரு கிராமத்தில் ஐவருக்கு கிருமித்தொர்று ஏற்பட்டதையடுத்து, அந்த கிராமமே தனிமைப்படுத்தப்பட்டது குறிப்பிடத்தக்கது.
#வியட்னாம் #கொரோனா #காணொளி