முஹம்மது ஃபைரோஸ்
எண்ணிக்கையில் மிகச் சிலரே அடையக்கூடிய வெற்றியை ஈட்டி இருக்கிறார் குமாரி மோனிகா கேப்ரியல், 23. சிங்கப்பூர் தேசியப் பல்கலைக் கழகத்தின் சட்டத் துறையில் பட்டக் கல்வி மேற்கொண்ட மோனிகா 'ஹானர்ஸ்' (முதல் வகுப்பு) தகுதியுடன் பட்டம் பெற்றுள்ளார். சிங்கப்பூர் தேசியப் பல்கலைக் கழகத்தில் கல்விப் பயணம் ஏற்ற இறக்கமாக அமைந்தது என்று கூறிய மோனிகா போட்டித்தன்மைமிக்க மாணவர்களுக்கு மத்தியில் எவ்வாறு தனித்து நிற்பது என தமக்குள் கேள்வி எழுந்தாலும் தொடக்கத்தில் எந்தவொரு வானளாவிய எதிர்பார்ப்பையும் உருவாக்கிக்கொள்ளவில்லை என்றார்.
கடந்த வாரம் நடைபெற்ற பல்கலைக்கழகப் பட்டமளிப்பு விழாவில் பட்டச் சான்றிதழைப் பெற்றுக்கொண்ட இவர், விடாமுயற்சி, அயராத உழைப்பு ஆகியவற்றால் வெற்றிக்கனி கிட்டியதென்றார். "தொடக்கத்தில், யதார்த்தமில்லாத எதிர்பார்ப்புகளை வைத்திருப்பது ஆரோக்கியமற்றது என்பதை உணர்ந்தேன். ஆனால், துறைத் தலைவரின் சாதனைப் பட்டியலில் தொடர்ச்சியாக இரு ஆண்டுகள் இடம்பிடித்தவுடன் எனக்குள் நம்பிக்கை பிறந்தது. நாம் செய்யும் செயலே நாம் யார் என்பதைப் பிரதிபலிக்கும்," என்றார் மோனிகா.
சிறந்த தேர்ச்சி பெற்றது தம்முடைய முயற்சிக்குக் கிடைத்த பலன் என்று கூறிய மோனிகாவுக்கு, பல நேரங்களில் வேலைப்பளுவினால் அடுத்த நாளுக்கு முடிக்க வேண்டிய வாசிப்புகளைக்கூட முடிக்க முடியாமல் போன நினைவுகளும் உண்டு. "சட்டத் துறை வழங்கும் கடுமையான பாடத்திட்டம் ஏராளமான சவால்களையும் வாய்ப்புகளையும் அள்ளித் தந்தது. கட்சிக்காரருக்கு கடிதம் வரைவது, வர்த்தக உடன்பாட்டை எழுதுவது, கொலைக் குற்றம் சாட்டப்பட்டவருக்கு ஆதரவாகக் குற்றவியல் தற்காப்பு வழக்கறிஞராக வாதாடுவது எனப் பல புதிய அனுபவங்கள் கிடைத்தன," என்று தமது கல்விப் பயணம் பற்றி விவரித்தார் மோனிகா. அயர்லாந்திலுள்ள 'டிரினிட்டி காலெஜ் டப்ளின்' பல்கலைக்கழகத்தில் மாணவர் பரிமாற்றத் திட்டத்தில் பங்கேற்றது இவருக்கு மறக்கமுடியாத அனுபவமாக அமைந்தது. குறிப்பிடத்தக்க காலகட்டத்திற்கு குடும் பத்தைவிட்டுப் பிரிந்திருந்தது சவாலாக அமைந்தாலும் துணிச்சல், தன்னம்பிக்கை போன்ற பண்புகளை வளர்த்துக்கொள்ள மோனிகாவுக்கு அது வாய்ப்பளித்தது.