மாணவர் முரசு
இ-பேப்பர்
உலக உடலியக்கப் பயிற்சி தினத்தை முன்னிட்டு டான் டோக் செங் மருத்துவமனை இரு உடற்பயிற்சி கையேடுகளை இம்மாதம் 8ஆம் தேதி வெளியிட்டது. ‘Keep It Fit’, ‘Get Active’ ஆகிய இந்த நூல்கள் துடிப்பான வாழ்க்கைமுறையை மேற்கொள்வதற்கான படங்கள், காணொளிகள், தகவல்குறிப்புகளைக் கொண்டுள்ளது.
இளையர்கள், முதியோர் இருதரப்பினருக்குமான ஏரோபிக் பயிற்சிகள், உடலை பலப்படுத்தும் பயிற்சிகள், உடலை சமநிலைப்படுத்தும் பயிற்சிகள் இவற்றில் உள்ளன.
பாதிப்பின் அளவைப் பொறுத்து கொவிட்-19 கிருமி ஒருவரது உடலில் பாதிப்பை ஏற்படுத்துகிறது. நுரையீரல் பாதிக்கப்படலாம். பெரும்பாலானோர் நன்கு குணமடைந்து விடுகின்றனர்.
ஆனால், கடுமையான பாதிப்புக்கு உள்ளானோருக்கு தொடர்ந்து மூச்சுவிடுவதில் சிரமம், சோர்வு, நுகர் உணர்ச்சி குறைந்திருத்தல் போன்ற பிரச்சினைகள் சில காலத்துக்குத் தொடரலாம்.
மருத்துவமனையில் இருக்கும்போது, வாதம், நுரையீரல் அல்லது நாளங்களில் ரத்தம் உறைதல் போன்ற பிரச்சினைகள் ஏற்பட்டால் அவர்கள் நலம்பெற சிறிது காலம் ஆகும்.
நிமோனியா, கொவிட்-19 பாதிப்பைக் கடுமையாக்குகிறது. சிலருக்கு சுவாசிக்க சுவாசக் கருவி தேவைப்படும். உடலியக்க சிகிச்சை நிபுணர்கள் அவர்களுக்கு சளியை வெளியேற்றி சுவாசத்தை எளிதாக்க உதவுகின்றனர். மறுவாழ்வு பயிற்சிகளில் உடலியக்கப் பயிற்சி சிகிச்சையாளர்கள் முக்கிய பங்காற்றுகின்றனர்.
ஒருவரின் உடல் குணமடையும் முயற்சியில், முன்கூட்டியே அளிக்கப்படும் உடலியக்க சிகிச்சை உதவுகிறது.
இந்த நூல்களை https://www.ttsh.com.sg/ டான் டொக் செங் மருத்துவ மனையின் இணையப் பக்கத்தில் காணலாம்.
