பிரசல்ஸ்: ஆக இளம் வயதில் ஒற்றையாளாக உலகை வலம் வந்து, கின்னஸ் சாதனைப் புத்தகத்தில் தமது பெயரை இடம்பெறச் செய்துள்ளார் பிரிட்டிஷ்-பெல்ஜியப் பெண்ணான ஸாரா ரதர்ஃபர்ட், 19.
கடந்த ஆண்டு ஆகஸ்ட் 18ஆம் தேதி, உலகின் அதிவேக குறுவிமானத்தில் இந்தச் சாதனை முயற்சியைத் தொடங்கினார் ஸாரா. ஐந்து கண்டங்கள், 52 நாடுகள் என 51,000 கிலோமீட்டர் தொலைவு பறந்த பிறகு நேற்று முன்தினம் 20ஆம் தேதி பெல்ஜியத்தின் கோர்ட்ரைக்-வெவல்ஜிம் விமான நிலையத்தில் இவர் தரையிறங்கினார்.
அங்கு இவருக்குப் பெரும் வரவேற்பு அளிக்கப்பட்டது. தமது இப்பயணத்தில் பல அற்புதத் தருணங்களைச் சந்தித்ததாகக் கூறிய ஸாரா, மீண்டும் ஒருமுறை தம்மால் இச்சாதனையை நிகழ்த்தவே முடியாது என்றும் சொன்னார்.
ஆப்கானிஸ்தானில் பிறந்த அமெரிக்கப் பெண்ணான ஷேஸ்டா வைஸ் கடந்த 2017ஆம் ஆண்டு தமது 30வது வயதில் தனியாளாக உலகை வலம் வந்ததே முன்னைய சாதனை.
ஆண்களைப் பொறுத்தமட்டில், 2018ல் தமது 18வது வயதில் தனியாக உலகைச் சுற்றி வந்து சாதனை படைத்திருந்தார் அமெரிக்காவின் மேசன் ஆண்ட்ரூஸ்.