மாணவர் முரசு
இ-பேப்பர்
கவின்விழி கதிரொளி
சிங்கப்பூரின் சிறந்த இளம் திரைப்படத் தயாரிப்பாளர்களைச் சிறப்பிக்கும் 'தேசிய இளையர் திரைப்பட விருதுகள்' இவ்வாண்டு எட்டாவது முறையாக இடம்பெறவுள்ளது.
'மாணவர்', 'இளையர்' பிரிவுகளில் மொத்தம் 24 விருதுகள் வழங்கப்படவுள்ளன.
'இளையர் உத்வேக விருது', 'மிகுந்த நம்பிக்கைக்குரிய விருது' எனும் இரு சிறப்பு விருதுகளும் வழங்கப்படும்.
நாடகங்களுக்கு எவ்வாறு கதை எழுதலாம் என பெயர்பெற்றவர்களிடமிருந்து இளம் தயாரிப்பாளர்கள் பயிற்சி பெற, 'தி சீரிஸ் லேப்' என்ற புத்தாக்க வழிகாட்டித் திட்டம் இவ்வாண்டு அறிமுகப்படுத்தப்படவுள்ளது.
'தி சீரிஸ் லேப்' திட்டம், தொடர்கதை எழுதத் தேவையான அடிப்படைத் திறன்களை இளம் திரைப்படத் தயாரிப்பாளர்களுக்கும் எழுத்தாளர்களுக்கும் கற்பிக்கும். இந்தத் திட்டத்திற்குத் தேர்வுபெறும் பத்துப் பங்கேற்பாளர்களுக்கு, சிறப்பு பேச்சாளரின் நேரலை உரை, ஆறு பயிலரங்குகள் மற்றும் மதியுரைஞர் இருவருடன் தொடர்பு போன்றவை காத்திருக்கின்றன.
ஆர்வமுள்ளோர் இம்மாதம் 13ஆம் தேதிக்குள் விண்ணப்பிக்கலாம்.
இலாப நோக்கமில்லா அமைப்பான ''ஸ்கேப்', 2015இல் தேசிய இளையர் திரைப்பட விருதுகளைத் தொடங்கியது. வளர்ந்து வரும் இளம் திரைப்பட த்தயாரிப்பாளர்களுக்கான தளத்தையும், சரியான வாய்ப்பையும் உருவாக்கி, அவர்களின் தொழில் வளர்ச்சிக்கு உதவுவதே அதன் இலக்கு.
"கடந்த ஆண்டு எங்களின் தேசிய இளையர் திரைப்பட விருதுகள் திரைப்பட வசதித் திட்டம், வளர்ந்து வரும் திரைப்படத் தயாரிப்பாளர்கள் தங்களுடைய சொந்த குறும்படங்களைத் தயாரிக்க உதவியதில் பெரும் வெற்றியைக் கண்டது. 'லோகார்னோ', 'ஃபேன்டெசியா', 'டொரன்டோ ஆஃப்டர் டார்க்' போன்ற முக்கியத் திரைப்பட விழாக்களுக்கு இந்தக் குறும்படங்கள் தேர்வுபெற்றன. இளையர்களை ஆதரிப்பதில் எங்களின் அர்ப்பணிப்பு, தொடர் முயற்சி ஆகியவற்றுக்குச் சான்றாக இவை திகழ்கின்றன," என்றார் 'ஸ்கேப்' நிர்வாக இயக்குநர் ஐவி லிம்.
இவ்வாண்டு விருது நிகழ்ச்சியின் சிறப்பு அங்கமாக, சென்ற ஆண்டில் 'சிறந்த அசைவூட்டம்' விருதைப் பெற்ற யோ சு சியென் வடிவமைத்த மெய்நிகர் உலகின் கூறுகளும் இடம்பெறவுள்ளன.
விண்ணப்ப விதிகள்
அசைவூட்டம், ஆவணப்படம் அல்லது குறும்படத்தைச் சமர்ப்பிக்க விரும்பும் பங்கேற்பாளர்கள் 35 வயதுக்குக்கீழ் இருக்க வேண்டும்.
வெற்றியாளர்கள் அனைவருக்கும் மொத்தம் $70,000 பரிசுத்தொகை அறிவிக்கப்பட்டுள்ளது. ஒவ்வொரு வெற்றியாளருக்கும் $1,000 ரொக்கப் பரிசு வழங்கப்படும். படைப்புகளைச் சமர்ப்பிப்பதற்கான இறுதி நாள் மே 13, 2022. மேல்விவரங்களுக்கும் திரைப்படங்களைச் சமர்ப்பிப்பதற்கும் நாட வேண்டிய முகவரி: https://scape.sg/nyfa
விருதுப் பட்டியல்
சிறந்த ஒலிப்பதிவு
சிறந்த கலை இயக்கம்
சிறந்த படத்தொகுப்பு
சிறந்த திரைக்கதை
சிறந்த ஒளிப்பதிவு
சிறந்த இயக்குநர்
சிறந்த இசை
சிறந்த செயலாக்கம்
சிறந்த ஆவணப்படம்
சிறந்த அசைவூட்டம்
சிறந்த குறும்படம்
