பர்மிங்ஹம்: ஆஸ்டன் வில்லாவும் லெஸ்டர் சிட்டியும் நேற்று அதிகாலை மோதிய இபிஎல் காற்பந்து ஆட்டம் 1=1 என்று சமநிலையில் முடிந்தது. ரியாத் மஹ்ரெஸ் பெனால்டியைத் தவறவிட்டபோதிலும் லெஸ்டர் சிட்டி பிரிமியர் லீக் பட்டியலில் முன்னிலையை எட்டி யுள்ளது. ஆட்டம் தொடங்கி 28வது நிமிடத்தில் லெஸ்டர் சிட்டி ஆட்டக்காரர் ஷின்ஜி ஒகஸாக்கி முதல் கோலைப் போட்டார். ஐந்து நிமிடங்களுக்குப் பிறகு, அலி சிஸ்ஸே„கோ கையால் பந்தைத் தடுத்ததற்காக லெஸ்டருக்கு ஒரு பெனால்டி வழங்கப்பட்டது. நட்சத்திர ஆட்டக்காரர் மஹ்ரேஸ் பெனால்டியை உதைத்தார்.
ஆஸ்டன் வில்லா கோல் காப்பாளர் மார்க் பன் தன் காலால் லாவகமாக அதைத் தடுத்ததால் லெஸ்டர் வாய்ப்பைத் தவற விட்டது. இரண்டாவது பாதி ஆட்டத்தில், 76வது நிமிடத்தில் ஆஸ்டன் வில்லாவின் ரூடி ஜெஸ்டேட் ஒரு கோல் போட்டு ஆட்டத்தைச் சமநிலைக்குக் கொண்டு வந்தார். இந்தச் சமநிலை மூலம் பிரிமியர் லீக் பட்டியலில் ஒரு புள்ளி முன்னணி பெற்றுள்ளது லெஸ்டர் சிட்டி. மறுபுறம், ஆஸ்டன் வில்லா பட்டியலின் கடைசியில் தொடர்ந்து தத்தளிக்கிறது.
ஷின்ஜி ஒகஸாக்கி லெஸ்டர் சிட்டிக்கான முதல் கோலை அடித்தார். 76வது நிமிடத்தில் ஆட்டத்தைச் சமப்படுத்தியது ஆஸ்டன் வில்லா. படம்: ராய்ட்டர்ஸ்