தொடக்கநிலை இறுதி ஆண்டுத் தேர்வுகளில் நண்பர்களைவிடப் பின்தங்கிய நிலையில் மனம் தளர்ந்துபோன சர்வின் ராஜ் ரகுபாலன், 16, பொதுக்கல்விச் சான்றிதழ் சாதாரண நிலைத் தேர்வுகளில் சிறப்புத் தேர்ச்சி பெற்றார். மருத்துவம் பயிலவேண்டும் என்ற தமது எதிர்கால இலக்கை நோக்கி முன்னேறி இருக்கிறார் சர்வின். சாதாரண நிலைத் தேர்வுகளில் 12 புள்ளிகளைப் பெற்ற உட்லண்ட்ஸ் உயர்நிலைப் பள்ளி மாணவரான சர்வின், தொடக்கக் கல்லூரிக்குச் சென்று அறிவியல் பாடங்களைப் பயிலவிருக்கிறார்.
தேர்வுகளில் சிறந்த தேர்ச்சியைப் பெற்று கல்வியில் சாதிக்க பல தியாகங்களைச் செய்ததாகச் சொன்ன அவர், "தொலைக்காட்சி பார்ப்பது, கணினியில் விளையாடுவது, வெளியே சென்று நண்பர்களோடு நேரம் கழிப்பது போன்றவற்றில் ஈடுபடுவதை நிறுத்திக்கொண்டு படிப்பில் கவனம் செலுத்தினேன்," என்றார். எளிய குடும்பப் பின்ன ணியைக் கொண்ட சர்வின், துணைப்பாட வகுப்புகளுக்குச் செல்லாமல் சொந்தமாகவே படித்து வெற்றி பெற்றுள்ளார்.