உயரமான இடங்களில் உலவும் கொசு போன்ற பூச்சிகளையும் அதன் உற்பத்தியையும் தேடிப் பிடித்து துடைத்தொழிப்பதற்கான பறக்கும் சாதனம் 25க்கும் மேற்பட்ட தேவைகளுக்குப் பயன்படுத்துவது குறித்து தேசிய சுற்றுப்புற வாரியம், கட்டடம், கட்டுமான முகவை, மனித வள அமைச்சு ஆகிய பொது முகவைகளால் சோதித்துப் பார்க்கப்பட்டன. மேற்கூரைகளில் வடிகால் போன்றவற்றை இந்த பறக்கும் சாதனத்தின் மூலம் எவ்வாறு ஆய்வு செய்வது போன்ற சோதனைகளை தேசிய சுற்றுப்புற வாரியம் மேற்கொண்டது. இதுபோன்ற வடிகாலில் கொசுக்கள் முட்டையிடுவதற்கான வாய்ப்புகள் அதிகம். உயரமான இடங்களில் இதுபோன்ற வடிகால்களை முகவை யின் சோதனையாளர்கள் பார்வையிடுவது என்பது சற்று சிரமமான காரியம்தான். இச் சமயங்களில் பறக்கும் சாதனங்களைப் பயன்படுத்தி கொசு உற்பத்தியாவதைத் தடுக்கலாம்.
கட்டுமானத் தளங்களிலும் பறக்கும் சாதனம் சோதனை செய்து பார்க்கப்பட்டது. ஏனெனில் கட்டுமானத் தளங்கள் ஏழு பொது முகவைகளால் சோதிக்கப்பட வேண்டியவை. எனவே பறக்கும் சாதனத்தால் எடுக்கப்படும் புகைப்படங்களை பொது முகவைகள் பகிர்ந்துகொள்ளும் வகையில் இணையத் தளம் ஒன்றை முகவைகளுக்கு இடையிலான குழு தொடங்கியுள்ளது. இதனால் ஒரே பணியை பலமுறை செய்வது தவிர்க்கப்படுகிறது. பறக்கும் சாதனங்களை பொது முகவைகளுக்கு மொத்தமாகக் கொள்முதல் செய்வதற்கான குத்தகை, பறக்கும் சாதனம் சார்ந்த நிபுணத்துவ சேவை ஆகியவற்றுக்கான குத்தகைக்கான ஒப்பந்த அறிவிப்பை இந்த மாத இறுதிக்குள் முகவைகளுக்கு இடையிலான குழு விடுக்கும்.