ஹவ்காங் தனித் தொகுதியைத் தக்க வைத்துக்கொண்டது

ஹவ்காங் தனித் தொகுதி, ‘பாட்டாளிக் கட்சியின் கோட்டை’ என்பது இந்தத் தேர்தலில் உறுதியாகி இருக்கிறது. இந்தத் தொகுதியில் புது முகத்தை பாட்டாளிக் கட்சி களம் இறக்கியது. என்றாலும் 61.19 விழுக்காட்டு வாக்குகளைப் பெற்று கட்சி பெரும் வெற்றி பெற்றது.

பாட்டாளிக் கட்சி வேட்பாளராகக் களமிறங்கிய கப்பல் துறை வழக்கறிஞர் டெனிஸ் டான், 49, மக்கள் செயல் கட்சி சார்பில் போட்டி இட்ட லீ ஹோங் சுவாங், 50, என்ற தகவல் தொழில்நுட்பத் துறை நிர்வாகியைத் தோற்கடித்தார்.

மக்கள் செயல் கட்சிக்கு 38.81 விழுக்காட்டு வாக்குகள் கிடைத்தன. சென்ற தேர்தலில் இங்கு போட்டியிட்ட பாட்டாளிக் கட்சி வேட்பாளர் பிங் எங் ஹுவாட் 57.7% வாக்குகளைப் பெற்று வென்றிருந்தார். அவருக்கு பதிலாக திரு டெனிஸ் டானை பாட்டாளிக் கட்சி களமிறக்கியது. திரு டான் மூன்று ஆண்டுகள் முன்பே தொகுதியில் பிரபலமடையத் தொடங்கினார்.

வெற்றி பெற்ற திரு டான், தொகுதிவாசிகளுக்கு நன்றி கூறினார்.

“ஹவ்காங் எழுச்சி இன்று வெளிப்படையாகத் தெரியவந்து ள்ளது. சிங்கப்பூரில் ஜனநாயகத்துக்கு அடையாளமாக ஹவ்காங் குறிப்பிடப்படுவது ஏன் என்பது இந்த வெற்றி மூலம் புரிகிறது,” என்றார் அவர்.

தலைசிறந்த முறையில் தொகுதி மக்களுக்குத் தொண்டாற்றப் போவதாகவும் நாடாளுமன்றத்தில் அவர் களுக்காக குரல்கொடுக்கப் போவதாகவும் திரு டான் குறிப்பிட்டார்.