சிங்கப்பூரில் இலவச பொது வை=ஃபை Wireless@SG சேவை வழங்கும் இணையப் பயன்பாட்டு வேகம் இவ்வாண்டு இறுதிக்குள் இருமடங்காகி 5Mbps வரை அதிகரிக்கப்படும். சிங்கப்பூரின் அறிவார்ந்த தேச நோக்கத்தை நிறைவேற்றக்கூடிய முக்கியமான அம்சமாக இந்தக் கட்டமைப்பை அரசாங்கம் கருதுகிறது. பொதுமக்களின் கைபேசி அகன்றகற்றைத் தேவையைப் பூர்த்தி செய்ய தொலைத்தொடர்பு நிறுவனங்களின் 4ஜி கட்டமைப்பை மேம்படுத்த Wireless@SG சேவை வழங்கப்படும் இடங்களின் எண்ணிக்கையும் இரட்டிப்பாக்கப்படும்.
2018ஆம் ஆண்டுக்குள் இந்த எண்ணிக்கை 20,000ஐ எட்டும். "எங்கும் வியாபித்திருக்கக் கூடிய, இடைவெளியற்ற, உயர்வேக இணைய இணைப்பை மக்களுக்கும் வர்த்தகங்களுக்கும் வழங்க நாம் முதல் தரமான கட்டமைப்பை உருவாக்க வேண்டும்," என்று இந்த மேம்பாடு குறித்து நேற்று நாடாளுமன்றத்தில் தொடர்பு, தகவல் துணை அமைச்சர் டாக்டர் ஜனில் புதுச்சேரி அறிவித்தார். தற்போதைய Wireless@SG சேவையின் வேகம் பொதுவான 4ஜி கைபேசிக் கட்டமைப்பு வழங்கும் வேகத்தைவிடக் குறைவாக இருக்கிறது என்று குறிப்பிட்ட சுவா சூ காங் குழுத்தொகுதியின் நாடாளுமன்ற உறுப்பினர் ஸாக்கி முகமது, அந்தச் சேவையின் வேகம் அதிகரிக்கப்படுமா என்று கேள்வி எழுப்பினார்.