மாணவர் முரசு
இ-பேப்பர்
முஹம்மது ஃபைரோஸ்
ரேஸ் கோர்ஸ் ரோட்டில் கிட்டத்தட்ட ஆறு ஆண்டுகள் செயல்பட்டு வந்த தமிழ் முரசு விளம்பரப் பிரிவு இம்மாதம் 6ஆம் தேதி திங்கட்கிழமை முதல் புதிய வசதிகளுடன் பேராக் ரோட்டில் செயல்படுகிறது. ஏற்கெனவே விளம்பரப் பிரிவு அலுவலகம் லிட்டில் இந்தியா, ஃபேரர் பார்க் எம்ஆர்டி நிலையங்களுக்கு இடையில் அமைந்திருந்தது.
எம்ஆர்டி நிலையங்களி லிருந்து தமிழ் முரசு விளம்பர அலுவலகத்துக்கு நடந்து வர சற்றுத் தூரமாக இருந்ததாக வாடிக்கையாளர்கள் சிலர் தெரிவித்திருந்தனர். அதைக் கருத்தில் கொண்டு அவர்களுக்கு மேலும் வசதியை ஏற்படுத்தித் தர அலுவலகம் இப்போது லிட்டில் இந்தியாவின் மையப் பகுதியில் இயங்குகிறது.
அத்துடன், முன்பு இரண்டாவது தளத்தில் செயல்பட்ட அது, அனைத்து வாடிக்கையாளர்களும் எளிதில் அணுக வகை செய்யும் விதத்தில் இப்போது தரைத் தளத்தில் செயல்படுகிறது. எப்போதும் வாடிக்கையாளர்களுக்கு மேம்பட்ட சேவையையும் வசதியையும் கொடுப்பதில் தமிழ் முரசு விளம்பரப் பிரிவு கவனம் செலுத்தி வருவதாக தெரிவித்தார் அதன் மேலாளர் திரு ஜீ. கருணாநிதி. "ரோச்சோர் ரயில் நிலையம், பேருந்து நிலையங்களுக்கு வெகு அருகிலேயே விளம்பரப் பிரிவு அமைந்துள்ளது. தரைத் தளத்தில் அமைந்துள்ளதால் வாடிக்கையாளர்களின் கண்களில் படும்படியாக உள்ளது," என்றார் அவர்.
இந்தப் புதிய இடம் விளம்பரப் பிரிவின் செயல்திறன்மிக்க சேவைக்கும் நம்பகத்தன்மைக்கும் வலுச்சேர்க்கும் என உறுதி கூறிய திரு கருணாநிதி, லிட்டில் இந்தியாவிலுள்ள வாடிக்கையாளர்களைச் சென்றடைய இது வகை செய்வதாகக் குறிப்பிட்டார். தமிழ் முரசில் முதன் முறையாக விளம்பரம் செய்ய பீஷான் வட்டாரத்திலிருந்து பேராக் ரோடு அலுவலகத்திற்கு வந்திருந்த உளவியல் ஆலோசகரான திருமதி சலின் எட்மண்ட், விளம்பரப் பிரிவின் இடமாற்றம் கூடுதலான வாடிக்கையாளர்களை ஈர்க்க உதவும் என்றார். "இனி, தமிழ் முரசு நாளிதழில் விளம்பரம் செய்ய தூரம் ஒரு பொருட்டல்ல. அத்துடன் இங்கு வழங்கப்படும் உன்னத சேவையை நான் பாராட்டுகிறேன்," என்றார் அவர்.
விளம்பரப் பிரிவின் புதிய இடம் விளம்பரதாரர்களுடனான தொடர்பை வலுப்படுத்த உதவும் என 'மலபார் கோல்ட் அண்ட் டைமண்ட்ஸ்' நகைக்கடையின் நிர்வாகி திரு எம். பரணி தெரிவித்தார். கஃப் ரோட்டில் அமைந்துள்ள 'சன்ஷைன் எக்ஸ்பிரஸ் கார்கோ' நிறுவன உரிமையாளர் திரு யூசுஃப் அலி, விளம்பரம் தொடர்பான விவரங்களை நேரடியாகச் சென்று கேட்டறிய வசதியாக இருக்கும் என்றார்.
பேராக் ரோடு மாயோ ஸ்திரீட் சாலைகள் சந்திக்கும் இடத்தில் வசதியாக அமைந்திருக்கும் தமிழ் முரசு விளம்பரப் பிரிவு, மக்களுக்குச் சேவையாற்ற காத்திருக்கிறது. படம்: திமத்தி டேவிட்
