சிங்கப்பூரில் தொடர்ந்து 19வது மாதமாக கடந்த மே மாதம் பணவீக்கம் குறைந்தது. கடந்த 1977 முதல் ஆக அதிக காலத்திற்குத் தொடர்ந்து பணவீக்கம் குறைந்துவந்திருப்பது இப்போதுதான். சென்ற ஆண்டுடன் ஒப்பிடுகையில் சென்ற மாதம் பயனீட்டாளர் விலைக் குறியீட்டு எண் 1.6% இறங் கியது. இந்தக் குறைவு ஏப்ரலில் 0.5% ஆக இருந்தது. குடும்பச் செலவு, பயனீட்டுச் செலவு, போக்குவரத்துச் செலவு ஆகியவை பணவீக்கம் குறைய காரணமாக இருந் தன. இந்த விவரங்களை சிங்கப்பூர் நாணய ஆணையமும் வர்த்தக தொழில் அமைச்சும் கூட்டறிக்கை ஒன்றில் குறிப்பிட்டன.
குடியிருப்புச் செலவு வருடாந்திர அடிப்படையில் 6.0% இறங்கியது. எரிபொருள், பயனீட்டுச் செலவு 9.5% குறைந்தது. தனியார் சாலை போக்குவரத்துச் செலவு வருடாந்திர அடிப்படையில் 7.6% குறைந்தது. தங்குமிடச் செலவு, தனியார் சாலை போக்குவரத்துச் செலவு ஆகியவற்றை நீக்கிவிட்டு கணக்கிடப்படும் மூலாதார பணவீக்கம் சென்ற மாதம் 1% கூடியது. இந்த அதிகரிப்பு ஏப்ரலில் 0.8% ஆக இருந்தது. இந்த மூலாதார பணவீக்கம் வரும் மாதங்களில் 0.0 முதல் 1% வரை இருக்கும் என்று எதிர்பார்க்கப்படுகிறது.