இவ்வாண்டு செப்டம்பர் மாதத்தில் உற்பத்தித் துறை, சென்ற ஆண்டின் அதே மாதத்தை ஒப்புநோக்க 6.7% வளர்ச்சி கண்டது. கடந்த இரண்டரை ஆண்டுகளில் உற்பத்தித் துறையின் ஆகச் சிறந்த மாதாந்திர வளர்ச்சி இதுதான். இதற்குமுன் 2014 மார்ச் மாதத்தில் அத்துறை 12.2% வளர்ச்சி கண்டிருந்தது. அதிக மாறுதலைச் சந்திக்கும் உயிர்மருத்துவத் துறையைத் தவிர்த்து உற்பத்தித் துறை 3.5% வளர்ச்சி அடைந்தது. மாதாந்திர அடிப்படையில், கடந்த ஆகஸ்ட் மாதத்தைவிட செப்டம்பரில் உற்பத்தித் துறை 3.3% உயர்வு கண்டது. உயிர் மருத்துவத் துறை நீங்கலாக, அதன் வளர்ச்சி 0.9 விழுக்காடாக இருந்தது.
முன்னதாக, 2016 செப்டம்பர் மாதத்தில் உற்பத்தித் துறை 1.2% சரியும் எனப் பொருளியல் வல்லுநர்கள் கணித்திருந்தனர். 2015 செப்டம்பரை ஒப்புநோக்க இவ்வாண்டு செப்டம்பரில் உயிர்மருத்துவத் துறை 22.2% வளர்ச்சியடைந்தது. கடந்த செப்டம்பர் மாதத்தில் உயிர்மருத்துவத் துறையின் வளர்ச்சி 26.9 விழுக்காடாகவும் மருத்துவத் தொழில் நுட்பத் துறையின் வளர்ச்சி 9.6 விழுக்காடாகவும் இருந்தது. ஒட்டுமொத்தமாக, 2015ஆம் ஆண்டின் முதல் ஒன்பது மாதங்களைவிட இவ்வாண்டின் முதல் ஒன்பது மாதங்களில் உற்பத்தித் துறை 8.2% மேம்பாடு கண்டது.