முஹம்மது ஃபைரோஸ்
சிங்கப்பூரின் பொன்விழா ஆண்டில் மண வாழ்க்கையைத் தொடங்கிய செம்பவாங் குழுத்தொகுதி நாடாளுமன்ற உறுப்பினர் விக்ரம் நாயருக்கு சென்ற ஆண்டு தலைத் தீபாவளியாக இருந்தாலும் இவ்வாண்டு புது வரவான மகள் இந்திராவுடனும் குடும்பத்தாருடனும் மகிழ்ச்சிகரமாக தீபாவளியை அவர் கொண்டாடுகிறார். ஓராண்டாகக் காதலித்த குமாரி ஃபெய் ஓங்கை சென்ற ஆண்டு மணந்தார் திரு விக்ரம் நாயர். கடந்த ஆண்டு அக்டோபரில் விக்ரம்-=ஃபெய் தம்பதிக்கு ஓர் அழகிய பெண் குழந்தை பிறந்தது. ஒரு வயதாகும் மகள் இந்திராவுடன் தீபாவளியை வரவேற்கும் இவர்களுக்கு இரு தரப்புக் குடும்பத்தாருடன் இனிய நாளைக் கழிப்பதற்கான சிறந்த வாய்ப்பாக இது அமைகிறது.
பொதுவாக இவர் தீபாவளியை நண்பர்களுடனும் செம்பவாங் குழுத்தொகுதி குடியிருப்பாளர்களுடனும் கொண்டாடுவது வழக்கம். அட்மிரல்ட்டி வட்டாரத்தில் வசிக்கும் இத்தம்பதியினர், யீஷூனில் உள்ள புனிதமரம் ஸ்ரீ பாலசுப்பிரமணியர் கோவிலுக்குச் சென்று வணங்கி இன்றைய தீபாவளிக் கொண்டாட்டத்தைச் சிறப்பாகத் தொடங்க உள்ளனர். சவுத் பிரிட்ஜ் ரோடு ஸ்ரீ மாரியம்மன் கோவிலுக்கு வழக்கமாகச் செல்லும் திருமதி ஃபெய், இன்று புனிதமரம் ஸ்ரீ பாலசுப்பிரமணியர் கோவிலுக்குக் கணவருடன் செல்வது குறித்து உற்சாகத்துடன் இருக் கிறார்.
இவ்வார இறுதியில் மகள் இந்திராவின் முதல் பிறந்தநாளைக் கொண்டாடுவது இந்தத் தம்பதிக்கு மட்டற்ற மகிழ்ச்சியைத் தருகிறது. "இந்துக் கடவுளைப் பிரதி பலிக்கும் விதத்தில் எங்கள் மகளுக்கு இந்திரா என்று பெயர் சூட்டினோம். இந்த மங்களகரமான தருணத்தில் குழந்தையின் பிறந்தநாளைக் கொண்டாடுவது ஆனந்தத்தைத் தருகிறது," என்றார் திருமதி ஃபெய், 39. அத்துடன், தம் தந்தையின் பிறந்தநாளையும் இன்று கொண்டாடுவதில் பூரிப்பு அடைகிறார் திரு விக்ரம். இரு தரப்பைச் சேர்ந்த குடும்பத்தாரும் மதிய உணவுக்காக உணவகம் ஒன்றில் ஒன்றுகூடத் திட்டமிட்டுள்ளனர்.
தீபாவளி போன்ற விழாக் காலங்களில் அனைவரும் நேரம் ஒதுக்கி ஒன்றிணைந்து அகமகிழ முடிவதாக இத்தம்பதி கூறினர். திரு விக்ரமின் தாயாருடைய குடும்பத்தினர் கிறிஸ்துவ சமயத்தைச் சேர்ந்தவர்கள். அவரது தந்தையாரின் குடும்பத்தினர் இந்து சமயத்தினர். எனவே, இளமைப் பருவத்திலிருந்தே தீபாவளி, கிறிஸ்மஸ் பண்டிகைகளை இவர் கொண்டாடுவது வழக்கம். புதிய வரவான இந்திராவுக்கு இருதரப்பு குடும்பத்தாரின் ஆசியைப் பெற்றுத்தர விரும்பும் விக்ரம், ஃபெய் தம்பதியினர் இத்தீபாவளியை முன்னிட்டு குடும்ப ஒன்றுகூடல் நிகழ்ச்சியை மிகவும் ஆவலுடன் எதிர்பார்க்கின்றனர்.
மகள் இந்திரா (வலது) கொண்டாடும் முதல் தீபாவளி இது என்பதாலும் தந்தையின் பிறந்தநாள் என்பதாலும் மிகுந்த உற்சாகத்துடன் காணப்படும் திரு விக்ரம் நாயர், அவரது மனைவி ஃபெய் ஓங். படம்: திமத்தி டேவிட்