செகார் ரோட்டில் குரங்கு தொல்லை

புக்கிட் பாஞ்சாங்கில் இருக்கும் செகார் வட்டாரத்தில் குரங்கு தொல்லை பெரும் பிரச்சினையாக உள்ளது என்றும் குரங்குகள் தாக்கிவிட்டதாகவும் சென்ற ஆண்டு அக்டோபர் முதல் 160 புகார்கள் வந்திருப்பதாக சிங்கப்பூர் வேளாண்- உணவு கால்நடை மருத்துவ ஆணையம் தெரிவித்துள்ளது. ஆகையால் அந்தப் பகுதியில் குரங்கு தொல்லை பொது பாதுகாப்பிற்கு ஆபத்தை ஏற்படுத்தக் கூடிய நிலையில் இருக்கிறது என்று ஆணையம் தெரிவித்தது. செகாரில் உள்ள வீடுகளுக்குள் இரண்டு குரங்குகள் நுழைந்துவிட்டதாகவும் அவற்றில் ஒரு குரங்கு சென்ற ஆண்டு நவம்பர் மாதம் பிடிபட்டுவிட்டதாகவும் மற்றொரு குரங்கு இன்னமும் மூர்க்கமாகத் திரிந்துவருவதாகவும் ஹாலாண்ட்-புக்கிட் தீமா குழுத்தொகுதி நாடாளுமன்ற உறுப்பினர் லியாங் எங் ஹுவா கூறினார். குரங்கு கடித்ததால் முதிய ஆடவர் ஒருவர் திங்கட் கிழமை மருத்துவமனையில் சேர்க்கப்பட்டது பற்றி தனக்குத் தெரியும் என்றும் இது பற்றி புலன்விசாரணை நடப்பதாகவும் ஆணையம் கூறியுள்ளது. குரங்குகள் பொதுமக்களுக்கு நோய்களை ஏற்படுத்திவிட முடியும் என்றும் மூர்க்கமான குரங்குகள் பொதுப் பாதுகாப்பிற்கு ஆபத்தை ஏற்படுத்திவிட முடியும் என்றும் ஆணையம் எச்சரித்தது.