பொருளியல் வளர்ச்சி மெதுவடைந்துள்ளது

நாட்டின் பொருளியல் வளர்ச்சி கடந்த ஆண்டு 0.7 விழுக்காடு வளர்ச்சி கண்டிருந்தாலும் முந்தைய ஆண்டின் 3.1 விழுக்காடு வளர்ச்சியுடன் ஒப்பிடுகையில் பொருளியல் வளர்ச்சி மெதுவடைந்துள்ளதாக வர்த்தக, தொழில் அமைச்சு நேற்று தெரிவித்தது.

சென்ற ஆண்டின் பொருளியல் வளர்ச்சி 0.5 விழுக்காட்டுக்கும் 1 விழுக்காட்டுக்கும் இடைப்பட்டிருக்கும் என்று அமைச்சு முன்னுரைத்திருந்தது.

பொருளியல் வளர்ச்சி 0.6 விழுக்காடாக இருக்கும் என்று ‘புளூம்பெர்க்’ ஆய்வு முன்னுரைத்திருந்தது. இதைக் காட்டிலும் 2019ஆம் ஆண்டின் வளர்ச்சி சற்று மேம்பட்டிருந்தாலும் 2018ஆம் ஆண்டுடன் ஒப்புநோக்க, வளர்ச்சி சரிந்து உள்ளது.

அத்துடன் 2009ஆம் ஆண்டில் இங்குப் பதிவாகியிருந்த ஆகக் குறைவான பொருளியல் வளர்ச்சியான 0.1 விழுக்காட்டுக்குப் பிறகு சென்ற ஆண்டின் பொருளியல் வளர்ச்சியே ஆகக் குறைவானது என்று கூறப்பட்டது.

2019ன் நான்காம் காலாண்டில் பொருளியல் 0.8 விழுக்காடு வளர்ச்சி கண்டிருந்தது. தனியார் துறை பொருளியல் நிபுணர்கள் முன்னுரைத்ததற்கு ஏற்ப இது அமைந்திருந்தது.

உற்பத்தித் துறையின் வளர்ச்சி தொடர்ந்து மந்தமாகவே உள்ளது. தொடர்ந்து நான்காம் காலாண்டாக அது சுருங்கியிருக்கிறது.

ஆண்டு அடிப்படையில் அத்துறை 2.1 விழுக்காடு சுருங்கியது. மூன்றாம் காலாண்டின் அதே 0.9 விழுக்காடு நான்காம் காலாண்டிலும் தொடர்ந்தது.

நுண்ணியல் பொறியியல், உயிரியல் மருத்துவ உற்பத்தி, பொதுவான உற்பத்தி ஆகியவை ஏற்றம் கண்டாலும் மின்னணுப் பொருட்கள், ரசாயனங்கள், போக்குவரத்துப் பொறியியல் ஆகியவற்றின் தேவை அதிகப்படியாக குறைந்திருந்ததால் இச்சரிவு ஏற்பட்டதாக அமைச்சு குறிப்பிட்டது.

இவ்வாண்டு உற்பத்தித் துறை மீண்டு வரும் என்றும் இவ்வாண்டில் சேவைகள் மற்றும் கட்டுமானத் துறைகள் பொருளியல் வளர்ச்சிக்கு அதிக ஏற்றம் அளிக்கும் என்றும் நம்பப்படுகிறது.