மாணவர் முரசு
இ-பேப்பர்
சிங்கப்பூரில் மின்னிலக்க ரீதியில்ஆன சேவைகளை மட்டும் வழங்கும் வங்கியை ஏற்படுத்த பிரிட்டனின் ஸ்டான்டர்ட் சார்ட்டர்ட் வங்கி திட்டமிடுகிறது. தொழிலாளர் இயக்கத்தின் சமூக நிறுவனங்களில் தனித்த, ஆகப்பெரிய அமைப்பான ‘என்டியுசி என்டர்பிரைஸ்’ நிறுவனத்துடன் சேர்ந்து இந்த வங்கியை அமைக்க ஸ்டான்டர்ட் சார்ட்டர்ட் முடிவு செய்து இருப்பதாக தகவல் அறிந்த வட்டங்கள் தெரிவித்துள்ளன.
புதிய வங்கியில் ஸ்டான்டர்ட் சார்ட்டர்ட் பெரும்பான்மை பங்குகளைக் கொண்டு இருக்கும். மற்றவை என்டியுசி என்டர் பிரைஸிடம் இருக்கும். இந்த விவகாரம் இன்னமும் ரகசியமாகவே இருக்கிறது. ஆகையால் இந்தத் தகவல்களைத் தெரிவித்தவர்கள் தங்கள் விவரங்களை வெளியிட விரும்பவில்லை.
தொழிலாளர் இயக்கம் பல சமூக நிறுவனங்களைக் கொண்டிருக்கிறது. என்டியுசி ஃபேர்பிரைஸ், என்டியுசி ஃபர்ஸ்ட் கேம்பஸ், என்டியுசி ஃபுட்ஃபேர், கோப்பிதியாம், என்டியுசி ஹெல்த், என்டியுசி இன்கம், என்டியுசி லேர்னிங்ஹப் ஆகியவை அவற்றில் அடங்கும்.
இந்த அமைப்புகளில் எல்லாம் தனித்த ஆகப் பெரிய நிறுவனமாக என்டியுசி என்டர்பிரைஸ் திகழ்கிறது. இந்தப் புதிய வங்கி தொடர்பான தொழில்முறை காரியங்களைக் கவனிக்க ஆஸ்திரேலியாவின் புதிய ‘ஜூடோ பேங்க்’ என்ற வங்கியின் இணை நிறுவனரான அலெக்ஸ் டுவிக் நியமிக்கப்பட்டு இருக்கிறார்.
ஸ்டான்டர்ட் சார்ட்டர்ட்-என்டியுசி என்டர்பிரைஸ் மின்னிலக்க வங்கிக்கு ‘புரோஜெட் ஃபோனிக்ஸ்’ என்று பெயரிடப்பட்டு இருப்பதாகவும் அந்தத் தகவல் வட்டாரங்கள் குறிப்பிட்டன. ஸ்டான்டர்ட் சார்ட்டர்ட் வங்கி சிங்கப்பூரில், டிபிஎஸ் குழுமம் போன்ற போட்டி நிறுவனங்களுக்கு ஈடுகொடுக்கும் வகையில் தன்னுடைய மின்னிலக்கமய உத்திகளை வேகப்படுத்தி வருகிறது.
‘கிராப்’ போன்ற வங்கி அல்லாத இதர நிறுவனங்களும் ஸ்டான்டர்ட் சார்ட்டர்ட் வங்கிக்குக் கடும் போட்டியாக தலை எடுத்துள்ளன.
கிராப் நிறுவனம் சிங்கப்பூரில் மின்னிலக்க உரிமம் ஒன்றைப் பெறுவதற்கு விண்ணப்பித்து இருக்கிறது. வங்கி சாராத இதர நிறுவனங்களுக்கு இந்த ஆண்டில் இத்தகைய ஐந்து உரிமங்களை சிங்கப்பூர் நாணய ஆணையம் வழங்கும் என்று அறிவிக்கப்பட்டு உள்ளது.
ஸ்டான்டர்ட் சார்ட்டர்ட்-என்டியுசி என்டர்பிரைஸ் வங்கி திட்டம் பற்றிய பேச்சுவார்த்தைகள் நடந்து வருகின்றன என்றும் அந்த வட்டாரங்கள் குறிப்பிட்டுள்ளன.
இந்த இரண்டு அமைப்புகளும் சேர்ந்து சிங்கப்பூரில் அமைக்கவிருக்கும் மின்னிலக்க வங்கி ஆசியாவில் ஸ்டான்டர்ட் சார்ட்டர்ட் ஏற்படுத்தும் இரண்டாவது மின்னிலக்க வங்கியாக இருக்கும்.
ஹாங்காங்கில் ‘மோக்ஸ்’ என்ற மின்னிலக்க வங்கியை நடத்துவதற்கான உரிமையை ஹாங்காங்கின் உள்ளூர் நிறுவனங்களுடன் சேர்ந்து ஸ்டான்டர்ட் சார்ட்டர்ட் ஏற்கெனவே பெற்று இருக்கிறது. என்றாலும் இந்தச் சேவை இன்னமும் முழுமையாக நடப்புக்கு வரவில்லை.
ஆப்பிரிக்காவில் ஸ்டான்டர்ட் சார்ட்டர்ட் வங்கி பல மின்னிலக்க வங்கிகளை நடத்துகிறது என்பது குறிப்பிடத்தக்கது.
