கரிம வெளியீட்டின் அதிகரிப்பைக் குறைப்பதற்கு சிங்கப்பூர் பல்வேறு முக்கிய படிநிலைகளை எடுத்துவருகிறது. இந்நிலையில், உலகிலேயே ஆகக் குறைவான கரிம வெளியீடு கொண்ட 20 நாடுகளில் ஒன்றாக உள்ளது. இருப்பினும், கரிம வெளியீட்டு அதிகரிப்பு தொடர்பில் வளர்ச்சி அடைந்த பல உலகநாடுகளை ஒப்பிடுகையில் சிங்கப்பூர் பின்தங்கியுள்ளதாக மார்ச் 12 அன்று வெளியிடப்பட்ட 'ஃபைனேன்ஷியல் டைம்ஸ்' (எஃப்டி) கட்டுரை ஒன்று தெரிவித்துள்ளது.
புள்ளிவிவரங்கள் உட்பட கட்டுரையில் மூன்று தவறான தகவல்கள் இடம்பெற்றுள்ளதாக பிரதமர் அலுவலகத்தின் தேசிய பருவநிலை மாற்றச் செயலகம், 'Factually' என்ற அரசாங்கத் தகவல் சரிபார்ப்பு இணையத்தளத்தில் நேற்று குறிப்பிட்டிருந்தது.
இவ்வாண்டு மார்ச் 19ஆம் தேதியன்று இது குறித்து அரசாங்கம் 'எஃப்டி'க்குத் தெரியப்படுத்தியும் நிறுவனம் இதுவரை எந்தப் பதிலும் அளிக்கவில்லை என்று கூறப்படுகிறது.