மார்சிலிங் வட்டாரத்தில் உள்ள ஒன்பது வீடமைப்பு வளர்ச்சிக் கழக புளோக்குகளை அரசாங்கம் கையகப்படுத்த இருக்கிறது.
இவ்வேளையில், அவற்றின் வீட்டு உரிமையாளர்கள், அதே வீட்டு வகையைத் தேர்ந்தெடுத்தால் புதிய வீடுகளுக்காக குறைந்த நிரப்புத் தொகை, அல்லது நிரப்புத் தொகையே செலுத்த தேவையில்லாமல் போகலாம். என்றாலும், புதிய வீட்டின் பரப்பளவு சற்று சிறியதாக இருக்கும்.
மார்சிலிங் கிரசெண்ட், மார்சிலிங் லேனில் உள்ள புளோக்குகள் 210 முதல் 218 வரை, உட்லண்ட்ஸ் சோதனைச்சாவடியின் விரிவாக்கத்திற்காக வழிவிடும் என கடந்த மாதம் அறிவிக்கப்பட்டு இருந்தது.
இதில் சம்பந்தப்பட்ட 732 வீட்டு உரிமையாளர்களுக்கு, ஒட்டுமொத்த மறுமேம்பாட்டுத் திட்டத்தின்கீழ் (செர்ஸ்) வழங்கப்படும் அதே அனுகூலங்கள் கிடைக்கும்.
அவர்களின் வீடுகளின் சந்தை மதிப்பின் அடிப்படையில் இழப்பீடும் புதிய வீட்டை வாங்குவதற்கான தெரிவும் அவற்றில் அடங்கும். உட்லண்ட்ஸ் ஸ்திரீட் 13ல் அத்தகைய வீடுகள் அமையவுள்ளன. அவற்றின் குத்தகைக் காலம் 99 ஆண்டுகள்.