பிராவோவுக்குப் பதிலாக இர்பான் பதன்

புதுடெல்லி: பத்தாவது ஐபிஎல் கிரிக்கெட் தொடர் நடைபெற்று வரும் நிலையில் குஜராத் அணியில் இடம்பெற்றிருந்த மேற்கிந்தியத் தீவுகளைச் சேர்ந்த வெய்ன் பிராவோ காயம் காரணமாக ஒரு போட்டியில்கூட ஆடாமல் இருந்தார். மேலும், காயம் ஆறாததால் சிகிச்சை மற்றும் ஓய்வுக்காக தன்னுடைய சொந்த நாட்டிற்கு அவர் திரும்பியுள்ளார். இந்நிலையில், அவரின் இடத்தை நிரப்ப இந்திய அணியின் முன்னாள் இடது கை பந்து வீச்சாளர் இர்பான் பதானை அந்த அணியின் நிர்வாகம் தேர்ந்தெடுத்துள்ளது. கடந்த பிப்ரவரி மாதம் நடைபெற்ற வீரர்களின் ஏலத்தின்போது இரு முறை இடம் பெற்றும் இர்பான் பதானை எடுக்க எந்த அணியும் முன் வரவில்லை. 102 ஐபிஎல் போட்டிகளில் விளையாடியுள்ள இர்பான் பதான் 80 விக்கெட்டுகள் மற்றும் 1,137 ஓட்டங்களை எடுத்துள்ளார் என்பது குறிப்பிடத்தக்கது.