மான்செஸ்டர்: இங்கிலிஷ் பிரிமியர் லீக் காற்பந்துப் போட்டியில் இதுவரை 36 ஆட்டங் களில் விளையாடி 72 புள்ளிகள் பெற்று பட்டிய லின் நான்காவது இடத்தில் மான்செஸ்டர் சிட்டி இருக்கிறது. பயர்ன் மியூனிக், பார்சிலோனா ஆகிய குழுக்களின் நிர்வாகியாக இருந்து இதே நிலை ஏற்பட்டிருந்தால் இந்நேரம் பதவி நீக்கம் செய்யப்பட்டிருப்பது உறுதி என்று மான்செஸ்டர் சிட்டியின் நிர்வாகி பெப் கார்டியோலா (படம்) தெரிவித்துள்ளார். ஸ்பெயின், ஜெர்மனி ஆகிய நாடுகளில் உள்ள லீக் ஆட்டங்களில் போட்டியிடும் ஜாம்பவான் குழுக்களின் நிர்வாகியாக இருந்து பல கிண்ணங்களை வென்றவர் கார்டியோலா.
இந்தப் பருவத்தின் தொடக்கத்தில் சிட்டியின் நிர்வாகியாகப் பொறுப்பேற்றார். ஆனால் இங்கி லாந்தின் காற்பந்துப் போட்டிகளில் கிண்ணம் வெல்வதில் அவர் சிரமத்தை எதிர்நோக்கி உள்ளார். இந்தப் பருவத்தில் எஞ்சியிருக்கும் ஆட்டங்களில் வெற்றி பெற்றாலும் சிட்டியால் மூன்றாவது இடத்துக்கு மேல் போக முடியாது. அதுமட்டுமல்லாது, இங்கிலிஷ் எஃப்ஏ கிண்ணம், லீக் கிண்ணம் ஆகிய போட்டிகளிலும் அது தோல்வியைத் தழுவி வெளியேறியது.