அண்டோரா லா வெய்ஜா
(அண்டோரா): உலகக் கிண்ணத் தகுதி ஆட்டத்தில் அண்டோராவை 5-0 எனும் கோல் கணக்கில் வீழ்த்தியுள்ளது இங்கிலாந்து. இந்த 'ஐ' பிரிவு ஆட்டத்தில் இதுவரை இங்கிலாந்து அணியில் அதிகம் இடம்பெறாமல் இருந்த டேமி ஆப்ரஹேம், ஜேம்ஸ் வார்ட்-பிரெளஸ் போன்ற வீரர்கள் சிறப்பாக ஆடினர். புக்காயோ சாக்கா, ஜேடன் சாஞ்சோ, ஃபில் ஃபோடன் போன்ற இளம் விளையாட்டாளர்களும் அசத்தி முத்திரை பதிக்கத் தொடங்கினர். பென் சில்வெல், புக்காயோ சாக்கா, டேமி ஆப்ரஹேம், ஜேம்ஸ் வார்ட்-பிரெளஸ், ஜேக் கிரீலிஷ் ஆகியோர் கோல்களை அடித்தனர். சில்வெல், கிரீலிஷ் இருவரும் முதன்முறையாக இங்கிலாந்துக்கு கோலடித்தனர்.
இவ்வாண்டு யூரோ 2020 போட்டி யின் இறுதியாட்டத்திற்குத் தகுதிபெற்றது இங்கிலாந்து. பெனால்டிகளில் இத்தாலியிடம் தோல்வியடைந்திருந்தாலும் அது 55 ஆண்டுகளில் அனைத்துலகப் போட்டி ஒன்றில் இங்கிலாந்து தகுதிபெற்ற முதல் இறுதியாட்டம்.
பொதுவாகப் பலரின் கண்டனத்திற்கு உள்ளாகும் இங்கிலாந்தின் விளையாட்டு அண்மைக் காலமாக விறுவிறுப்பாக இருந்து வந்துள்ளது. அணியில் உள்ள சில இளம் வீரர்களின் துடிப்புமிக்க ஆட்டம் இதற்கு ஒரு காரணம். 'ஐ' பிரிவில் முதலிடத்தை வகிக்கும் இங்கிலாந்து, தொடர்ந்து ஆறாவது முறையாக உலகக் கிண்ணப் போட்டிக்குத் தகுதிபெறுவது கிட்டத்தட்ட உறுதியாகிவிட்டது.
கேரத் சவுத்கேட்டின் அணி, இதுவரை விளையாடியுள்ள ஏழு ஆட்டங்களில் ஆறை வென்றுள்ளது. ஓர் ஆட்டம் சமநிலையில் முடிந்தது. ஏழு ஆட்டங்களில் 23 கோல்களைக் குவித்துள்ளது இங்கிலாந்து.
அடுத்ததாக இங்கிலாந்து நாளை ஹங்கேரியைச் சந்திக்கிறது.