ஸ்கொப்யி (நார்த் மாசிடோனியா): நார்த் மாசிடோனியாவை 4-0 எனும் கோல் கணக்கில் வென்று அடுத்த உலகக் கிண்ணக் காற்பந்துப் போட்டிக்குத் தான் தகுதிபெற்றுள்ளது ஜெர்மனி. ஐரோப்பிய கண்டத்திற்கான உலகக் கிண்ணத் தகுதிச் சுற்றுகளின் ஜே பிரிவில் ஜெர்மனி முதலிடத்தை வகிக்கிறது.
இப்பிரிவில் எஞ்சியுள்ள இரண்டு ஆட்டங்களைத் தோற்றாலும் முதலிடத்தைத் தக்கவைத்துக்கொள்ள போதுமான புள்ளிகளைப் பெற்றுள்ளது ஜெர்மனி. ஒவ்வொரு பிரிவிலும் முதலிடத்தைப் பிடிக்கும் அணி உலகக் கிண்ணத்திற்குத் தகுதிபெறும், இரண்டாம் இடத்தை வகிக்கும் அணி 'பிளேஆஃப்' எனும் கடைசி தகுதிச் சுற்றுக்குச் சென்று போட்டிக்குத் தகுதிபெற முயற்சி செய்யும்.
ஜெர்மனியின் நான்கு கோல்களும் பிற்பாதியாட்டத்தில் விழுந்தன. இங்கிலாந்தின் செல்சி அணியைச் சேர்ந்த காய் ஹெவர்ட்ஸ் ஒரு கோலை அடித்தார். மற்றொரு செல்சி விளையாட்டாளரான திமோ வர்னர் இரண்டு கோல்களை அடித்தார். ஜமால் முசியாலா நான்காவது கோலை அடித்தார்.
மேற்கு ஜெர்மனியாக மூன்று முறையும் ஒருங்கிணைந்த ஜெர்மனியாக ஒருமுறையும் உலகக் கிண்ணத்தை வென்றுள்ளது ஜெர்மனி.
ஆனால் ரஷ்யாவில் நடைபெற்ற சென்ற உலகக் கிண்ணப் போட்டியில் இவ்வணி முதல் சுற்றைத் தாண்டவில்லை. கடந்த சில ஆண்டுகளாகத் தொடர்ந்து சிறப்பாக ஆட சிரமப்பட்டு வருகிறது ஜெர்மனி. அதை மாற்றும் இலக்கைக் கொண்டுள்ளார் அணியின் புதிய பயிற்றுவிப்பாளர் ஹன்சி ஃபிலிக். ஜே பிரிவில் தற்போது இரண்டாம் இடத்தில் ருமேனியா உள்ளது.
ஜி பிரிவில் ஜிப்ரால்டாவை 6-0 எனும் கோல் கணக்கில் வீழ்த்தியது நெதர்லாந்து. இப்பிரிவில் அவ்வணி முதலிடத்தை வகிக்கிறது. சென்ற உலகக் கிண்ணத்திற்குத் தகுதிபெறத் தவறிய நெதர்லாந்து, 1974ஆம் ஆண்டு போட்டியில் படைத்த அபார விளையாட்டு இன்னமும் ரசிகர்களின் மனத்தில் நீங்கா இடத்தைப் பிடித்துள்ளது.