இங்கிலாந்தின் பர்மிங்ஹம் நகரில் நடந்துவரும் காமன்வெல்த் விளையாட்டுப் போட்டிகளில் கலப்பு இரட்டையர் பூப்பந்துப் போட்டியில் முதன்முறையாகத் தங்கம் வென்று சாதனை படைத்தது சிங்கப்பூரின் டெரி ஹீ-ஜெசிக்கா டான் இணை.
உலகத் தரவரிசையில் 35ஆம் இடத்தில் இருக்கும் சிங்கப்பூர் இணை, 10ஆம் இடத்திலுள்ள இங்கிலாந்தின் மார்க்கஸ் எல்லிஸ் - லாரன் ஸ்மித் இணையை 21-16, 21-15 என்ற புள்ளிக் கணக்கில் தோற்கடித்தது.
மொத்தம் 5,000 பேர் அமர்ந்து பார்க்கும் வசதிகொண்ட அரங்கத்தில் நடந்த இறுதிப் போட்டியில் உள்ளூர் ஆட்டக்காரர்களுக்கே பேராதரவு இருந்தது.
இருந்தாலும், சக சிங்கப்பூர் குழுவினரும் மலேசிய ரசிகர் ஒருவரும் உற்சாகக் குரல் எழுப்பி, ஹீ - டான் இணையை ஊக்கப்படுத்தியபடி இருந்தனர்.
கடந்த 2002ஆம் ஆண்டில் மகளிர் ஒற்றையர் பிரிவில் லீ லீ தங்கம் வென்ற பிறகு, காமன்வெல்த் போட்டிகளில் பூப்பந்தில் சிங்கப்பூர் தங்கப் பதக்கத்தைக் கைப்பற்றியது இதுவே முதன்முறை.
இதற்குமுன் 2006, 2010ஆம் ஆண்டு நடந்த காமன்வெல்த் போட்டிகளில், கலப்பு இரட்டையர் பூப்பந்தில் சிங்கப்பூர் வெண்கலம் வென்றிருந்தது.
நடப்பு காமன்வெல்த் போட்டிகளில் பூப்பந்து விளையாட்டில் சிங்கப்பூர் இதுவரை மூன்று பதக்கங்களைத் தனதாக்கியுள்ளது.