லாகூர்: சமூக ஊடகங்களில் பிரபலமடைந்து வந்த பாகிஸ்தானிய இளம்பெண் அவரது சகோதரரால் கௌரவக்கொலை செய்யப்பட்டுள்ளதாக போலிசார் தெரிவித்துள்ளனர். கான்டீல் பாலோச் (படம்) எனும் 26 வயது நடிகையும் விளம்பர நாயகியுமான அந்தப் பெண்ணை பாகிஸ்தானின் பஞ்சாப் மாகாணத்திலுள்ள முல்தானில் நேற்று முன்தினம் இரவு கழுத்தை நெரித்துக் கொலை செய்த பிறகு அவரது சகோதரர் வாசிம் தப்பியோடிவிட்டதாக மாவட்ட தலைமை போலிஸ் அதிகாரி அஸார் அக்ரம் கூறினார். இந்த விளம்பர மாடல் தனது இயற்பெயரான ஃபௌஸியா அஸீம் என்பதை கான்டீல் பாலோச் என மாற்றிக்கொண்டார்.
விளம்பரத் துறையிலிருந்து வெளியேறும்படி அவரது குடும்பத்தார் அவரை வற்புறுத்தியதாகக் கூறப்படுகிறது. மூன்று வாரங்களுக்கு முன்பாகத் தமக்கு பாதுகாப்பு அளிக்குமாறு உள்துறை அமைச்சர், மத்திய புலனாய்வு அதிகாரி ஆகியோருக்கு அவர் கடிதம் எழுதியிருந்ததாக உள்ளூர் செய்தி நிறுவனம் டான் குறிப்பிட்டது. பாகிஸ்தானின் முன்னாள் கிரிக்கெட் வீரரும் எதிர்க்கட்சி அரசியல்வாதியுமான இம்ரான் கானைத் திருமணம் செய்ய விரும்புவதாக அவர் பலமுறை வெளிப்படையாகவே கூறியுள்ளார்.