இளையர் மொழித்திறனை வளர்க்கும் 'நானும் ஒரு படைப்பாளி'

‘ஷேக்ஸ்பியர்’ நாடகத்தைத் தமிழில் மேடையேற்ற வேண்டும், தாங்கள் எழுதிய தமிழ் புனைகதையை நூலாக வெளியிட வேண்டும் என்பது போன்ற மாணவர்களின் ஆர்வங்களுக்குத் தளம் அமைக்கிறது ‘நானும் ஒரு படைப்பாளி’ திட்டம்.

கல்வி அமைச்சின் தாய்மொழித் துறையின் தமிழ்மொழிப் பிரிவு இதனை ஓர் எழுத்துத்திறன் போட்டியாக பல ஆண்டுகளுக்கு நடத்தி வந்தது. 

இப்போது இத்திட்டம் பல மாற்றங்களோடு விரிவாக்கம் கண்டு தொடர் கற்றல் பயணமாக உருவெடுத்துள்ளது. இத்திட்டத்தில் மொத்தம் மூன்று பிரிவுகள் உள்ளன. சிறுகதை, கவிதை, நாடக வசனம் எழுதுதல் என தங்களுக்கு பிடித்த பிரிவுகளில் மாணவர்கள் பங்கெடுக்கலாம். 

மொத்தம் 250க்கும் மேற்பட்ட உயர்நிலை, தொடக்கக்கல்லூரி,  மாணவர்கள் இவ்வாண்டின் திட்டத்தில் கலந்துகொண்டனர்.

முதல் கட்டமாக, மாணவர்கள் எழுத்து, நாடகம் சார்ந்த துறைகளில் உள்ள சிறந்த திறனாளர்களிடமிருந்து எழுதுவதற்கான அடிப்படைக் கூறுகளைப் பயிலரங்கு வழியாகக் கற்றுக்கொண்டனர். அதன் பிறகு, மாணவர்களாகவே தங்களது படைப்புகளை எழுத முனைந்தனர்.

இதில் அதிக ஆர்வம் காட்டும் மாணவர்களுக்கு எழுதுவது பற்றி சொல்லித் தரும் வகையில்  உள்ளூர் படைப்பாளர்கள் மற்றொரு பயிலரங்கை நடத்தினர்.

இவ்வாண்டு பிப்ரவரி, மார்ச் மாதங்களில் இந்தப் பயிலரங்குகள் நடைபெற்றன. தங்களது ஆர்வத்தை அடுத்த நிலைக்கு எடுத்துச்செல்வதற்கு இத்திட்டம் உதவியது என்று தமிழ் முரசிடம் பேசிய மாணவர்கள் தெரிவித்தனர்.  

சிறுகதையை சுருக்கமாக எழுதுவது, கதையின் உச்சக்கட்டத்தை சுவையாக எடுத்தியம்புவது, ஒரு சூழ்நிலையை வர்ணித்து சொந்த நடையில் எழுதுவது போன்ற உத்திகளைக் கற்றுக்கொண்டதாகக் கூறினார் சிறுகதைப் பிரிவில் பங்கேற்ற சகினாபானு முஹம்மது ஷாபி. இவர் செங்காங் உயர்நிலைப் பள்ளியில் உயர்நிலை ஒன்றாம் நிலை மாணவர்.

தெம்பனிஸ் மெரிடியன் தொடக்கல்லூரியில் பயிலும் நாகராஜ் யோகபிரியாவுக்கு, தம்மால் கவிதை எழுத முடியுமா என்ற ஐயம் தொடக்கத்தில் இருந்தது. ஆனால் தமது ஆசிரியரின் ஊக்குவிப்பில் இத்திட்டத்தில் அவர் சேர்ந்தார்.

"கவிதைகளை எழுதுவதற்குப் பலவகையான உத்திகளைக் கையாளலாம் என்று கற்றுக்கொண்டேன். எதிர்காலத்தில் எழுத்துத் துறையில் ஈடுபடாவிட்டாலும், தமிழ் ஆசிரியராக வேண்டும் என்ற எனது குறிக்கோளை அடைய இங்கு கற்றவை உதவும்,’’ என்று யோகபிரியா குறிப்பிட்டார்.

நாடக வசனம் எழுதும் பிரிவில் பங்குபெற்ற இயோ சூ காங் உயர் நிலைப் பள்ளி மாணவர் சரவணன் மித்ரா, புதிய தமிழ்ச் சொற்களைப் பயிலரங்குகளில் கற்றுக்கொண்டதால் தமது மொழி வளம் பெருகியது என்றார்.

உயர்நிலை இரண்டாம் நிலையில் பயிலும் மித்ரா, பள்ளி நாடக இணைப்பாட நடவடிக்கையில் ஈடுபடுகிறார். தாம் கற்ற உத்திகளை தமது பள்ளி நாடகப் படைப்புகளில் பயன்படுத்த ஆவலாக இருப்பதாகச் சொன்னார் அவர்.

இப்பகுதியில் மேலும் செய்திகள்

தேக்காவின் கவர்ச்சிமிகு தீபாவளி அலங்காரம்.

14 Oct 2019

தேக்காவில் செல்ஃபி எடுக்க சிறந்த இடங்கள்

தீபாவளிச் சந்தையில் இவ்வாண்டு முதன்முறையாகக் கடை வைத்துள்ள வைஷ்ணவியும் இளமாறனும்.

14 Oct 2019

தீபாவளி வியாபாரத்தில் இளையர்கள் ஆர்வம்