மாணவர் முரசு
இ-பேப்பர்
சிறுவர்களுக்கு காக்கா, குருவி, கிளி, குயில், மயில், புறா, கொக்கு, வாத்து என பெரும்பாலான பறவைகளைப் பற்றி தெரிந்திருக்கிறது. ஆனால், ஆந்தைகளைப் பற்றித் தெரியுமா என்று கேட்டால், ஆந்தை போல முழிக்கத்தான் செய்வார்கள். காரணம், ஆந்தைகள் பொதுவாக ஆள் நடமாட்டம் இல்லாத பகுதிகளில்தான் புழங்குகின்றன. ஆந்தைகளைப் பற்றிக் குழந்தைகள் அறிவதற்கு நிறைய அசத்தலான விஷயங்கள் உள்ளன.
ஆந்தை என்றால் நம் கண்முன்னால் முதலில் வருவது அதன் பெரிய வட்ட வடிவக் கண்கள்தான். ஆந்தைக்கு இருக்கும் பெரிய கண்கள்தான் சிறந்த பைனாகுலர்கள். அவற்றின் பார்வை சக்தி, மனிதரின் கண்களின் பார்வை சக்தியைவிட ஐம்பது மடங்கு அதிகம் என்று கணித்திருக்கிறார்கள். அதற்கு இருக்கும் இரவுப் பார்வைத்திறன் அபாரமானதாகும்.
நூறடி தூரத்தில் ஒரு சுண்டெலியைத் துல்லியமாகப் பார்க்கும் திறன் கொண்டவை ஆந்தையின் கண்கள்.
ஆந்தையின் கண்கள் பக்கவாட்டிலும் மேலும் கீழும் நம் கண்களைப் போல அசையாது. இதன் காரணமாக அதன் கழுத்தை 270 டிகிரி கலங்கரை விளக்கம் போலச் சுற்றும்படி இயற்கை படைத்துள்ளது.
ஆந்தையின் அருகே இருக்கும் பொருள்கள் எல்லாம் அதற்கு மங்கலாகத்தான் தெரியுமாம்.
அனைத்து உயிரினங்களும் இரையை அல்லது உணவை மென்று தின்கின்றன. ஆனால், ஆந்தையால் அது முடியாது.
இரையைத் துண்டு துண்டாய் அப்படியே விழுங்கிப் பின் வேண்டாத, செரிக்க முடியாத எலும்பு போன்றவற்றை வாய் வழியே துப்பிவிடும். அப்படித் துப்பப்பட்ட கழிவுகளை அவை வாழும் கூடுகளின் கீழே பார்க்கலாம்.
மற்ற பறவைகள் பறக்கும்போது அவற்றின் இறக்கைகள் ஒவ்வொரு விதமாகச் சத்தம் ஏற்படுத்தும். ஆனால், ஆந்தை பறக்கும்போது துளிகூட சத்தம் வராது.
தொடர்புடைய செய்திகள்
இதன் சிறகுகள் சீப்பு போல இருப்பதால் காற்றுக்கு வழிவிட்டுச் சத்தம் ஏற்படாமல் செய்துவிடும். சைலன்சர் பொருத்திய என்ஜின்போல இதன் இறக்கைகள் செயல்படுவதால் ஆந்தை வருவதும் தெரியாது, போவதும் தெரியாது.
ஆந்தை ஒரு வண்ணப் பறவை அல்ல. அதன் இறகுகளின் நிறம் வெறும் சாம்பல்தான். ஆனால், ஆந்தைகள் பார்ப்பவரைக் கவர்ந்திழுக்கும் ஒரு கறுப்பு வெள்ளை நிறப் பறவை தான். சந்தேகமே இல்லை. பத்தோடு பதினொன்று என்று சொல்லக்கூடிய பறவை இல்லை இது. ஆந்தை ஆயிரத்தில் ஒரு பறவை என்று சொல்லக்கூடிய அளவுக்கு ஒரு தனிப்பிறவிப் பறவை. ஆந்தை பெரும்பாலும் இரவில் காணப்படுவதால் அதைப் பார்த்து பலரும் பயப்படுகிறார்கள். ஆந்தை ஓர் அப்பாவிப் பறவை.