மந்திரக் கைத்தடி

குமரன், வீட்டில் வைத்திருந்த வைர மோதிரம் காணவில்லை என்று அரசரிடம் வந்து முறையிட்டார்.

அதைக்கேட்ட அரசர், “உங்களுக்கு யார் மீது சந்தேகம்?” என்று கேட்டார்.

உடனே குமரன், “என் பணியளர்கள் மீதுதான் எனக்கு சந்தேகம்,” என்றார்.

உடனே அரசர் அவர்களை அழைத்து ஒவ்வொருவருக்கும் ஒரே அளவுள்ள கைத்தடிகளைக் கொடுத்து, “இது மந்திரக் கைத்தடி. இதை இன்று எடுத்துப்போய் வீட்டில் வைத்திருந்துவிட்டு நாளை எடுத்து வாருங்கள். யார் திருடினாரோ அவரின் கைத்தடி ஓர் அடி அதிகமாக வளர்ந்திருக்கும்,” என்று கூறி அனைவரையும் அனுப்பி வைத்தார்.

மறுநாள் அனைவரும் தங்கள் கைத்தடிகளுடன் சபைக்கு வந்தனர். ஒருவரின் கைத்தடி மட்டும் ஓர் அடி குறைவாக இருந்தது. அதைப் பார்த்த அரசர், “இவன்தான் அந்த திருடன்?” என்று கூறினார். திருடனும் பயத்துடன் உண்மையை ஒத்துக்கொண்டான்.

அரசரை ஆச்சரியத்துடன் பார்த்த மக்களிடம், “இது மந்திரக் கைத்தடி இல்லை. சாதாரண கைத்தடிதான். திருடியவன் இது மந்திரக் கைத்தடி. வளர்ந்துவிடும் என்ற பயத்தில் ஓர் அடி வெட்டிவிட்டுக் கொண்டு வந்தான். அதனால்தான் என்னால் திருடனைக் கண்டுபிடிக்க முடிந்தது,” என்று கூறினார்.

அரசரின் புத்திகூர்மையை நினைத்து மக்கள் மகிழ்ந்து போனார்கள்.