மாணவர் முரசு
இ-பேப்பர்
ராய்ப்பூர்: இந்தியா - ஆஸ்திரேலியா அணிகளுக்கு இடையிலான நான்காவது டி20 கிரிக்கெட் போட்டி சத்தீஸ்கர் மாநிலம், ராய்ப்பூரில் உள்ள ஷாகீத் வீர் நாராயண் சிங் விளையாட்டரங்கில் டிசம்பர் 1ஆம் தேதி இந்திய நேரப்படி இரவு 7 மணிக்குத் தொடங்கவிருக்கிறது.
ஆயினும், போட்டி தொடங்க சில மணி நேரமே உள்ள நிலையில், அந்த அரங்கின் சில பகுதிகளில் மின்விநியோகம் இல்லை. காரணம், கடந்த 2009ஆம் ஆண்டிலிருந்து மின்கட்டணம் செலுத்தாததுதான்!
அந்த அரங்கம் 3.16 கோடி ரூபாய் மின்கட்டண நிலுவை வைத்துள்ளது. அதனால், ஐந்து ஆண்டுகளுக்கு முன்பாகவே அரங்கிற்கான மின்னிணைப்பு துண்டிக்கப்பட்டுவிட்டது.
சத்தீஸ்கர் மாநில கிரிக்கெட் சங்கம் கேட்டுக்கொண்டதையடுத்து, தற்காலிக இணைப்பு நிறுவப்பட்டுள்ளது. ஆனால், அது பார்வையாளர் அமரும் பகுதிக்கு மட்டுமே மின்சாரம் வழங்கும். உயரத்திலிருந்து திடலுக்கு ஒளிதரும் விளக்குகளுக்கு மின்னாக்கி (ஜெனரேட்டர்) மூலமே மின்சாரம் வழங்கப்பட்டாக வேண்டிய நிலை.
கடந்த 2018ல் மின்னிணைப்பு துண்டிக்கப்பட்டதிலிருந்து அவ்வரங்கம் மூன்று அனைத்துலகப் போட்டிகளை நடத்தியுள்ளது.
அரங்கின் பராமரிப்புப் பணிகளை மாநிலப் பொதுப்பணித்துறை மேற்கொண்டு வருகிறது. மற்றச் செலவுகளுக்கு விளையாட்டுத் துறை பொறுப்பேற்கிறது.
இந்நிலையில், மின்கட்டணத்தை யார் செலுத்துவது என்பதில்தான் பிரச்சினை என்றும் மின்கட்டணம் செலுத்தப்படாமைக்கு இரு அமைப்புகளும் மாறி மாறி குற்றம் சாட்டி வருகின்றன என்றும் என்டிடிவி செய்தி கூறியது.
ஐந்து போட்டிகள் கொண்ட டி20 முதலிரு போட்டிகளில் இந்தியாவும் மூன்றாவது போட்டியில் ஆஸ்திரேலியாவும் வென்றன.
