லண்டன்: அயர்லாந்து அணிக்கெதிரான டெஸ்ட் போட்டியில் இரட்டை சதமடித்ததன்மூலம் இங்கிலாந்து கிரிக்கெட் வரலாற்றில் சாதனையாளர்கள் பட்டியலில் தமது பெயரை இடம்பெறச் செய்தார் ஒல்லி போப் (படம்).
இங்கிலாந்து-அயர்லாந்து மோதும் ஒரே ஒரு டெஸ்ட் போட்டி இம்மாதம் 1ஆம் தேதி லண்டன் லார்ட்ஸ் விளையாட்டரங்கில் தொடங்கியது. முதலில் பந்தடித்த அயர்லாந்து அணி 172 ஓட்டங்களில் சுருண்டது. இங்கிலாந்து வேகப் பந்துவீச்சாளர் ஸ்டூவர்ட் பிராட் ஐந்து விக்கெட்டுகளைச் சாய்த்தார்.
அடுத்து தனது முதல் இன்னிங்சைத் தொடங்கிய இங்கிலாந்து அணி மளமளவென ஓட்டம் குவித்தது. தொடக்க வீரர் பென் டக்கெட் 178 பந்துகளில் 182 ஓட்டங்களை விளாசினார்.
மூன்றாவதாகக் களமிறங்கிய போப் 205 ஓட்டங்கள் எடுத்து ஆட்டம் இழந்தார். அவர் 207 பந்துகளில் 200 ஓட்டங்களைத் தொட்டார். இதன்மூலம் இங்கிலாந்து மண்ணில் அதிவேகமாக இரட்டை சதம் அடித்தவர் என்ற பெருமையை அவர் பெற்றார். முன்னதாக, 1982ஆம் ஆண்டு இயன் போத்தம் 220 பந்துகளில் இரட்டை சதமடித்திருந்தார்.
முதல் இன்னிங்சில் இங்கிலாந்து நான்கு விக்கெட் இழப்பிற்கு 524 ஓட்டங்களைக் குவித்தது.