மான்செஸ்டர்: ஒருகாலத்தில் இங்கிலிஷ் பிரிமியர் லீக்கிலேயே சரியாக விளையாட முடியாமல் தடுமாறிவந்த மான்செஸ்டர் சிட்டி இன்று ஐரோப்பாவின் ஆகப் பெரிய காற்பந்து குழுக்களில் ஒன்றாக வளர்ந்துள்ளது. வரலாற்றில் முதன்முறையாக ஐரோப்பிய சாம்பியன்ஸ் லீக் கிண்ணத்தை வெல்லும் இலக்குடன் உள்ளது அக்குழு.
இப்பருவத்தின் சாம்பியன்ஸ் லீக் அரையிறுதிச் சுற்றின் இரண்டாம் ஆட்டத்தில் நடப்பு வெற்றியாளரான ஸ்பெயினின் ரியால் மட்ரிட்டை இன்று சந்திக்கிறது சிட்டி.
அரையிறுதிச் சுற்றின் முதல் ஆட்டம் 1-1 எனும் கோல் கணக்கில் சமநிலையில் முடிந்தது. சுற்றின் இரு ஆட்டங்களிலும் பதிவாகும் மொத்த கோல் எண்ணிக்கையைக் கொண்டு வெற்றிபெறும் குழு எது என்பது முடிவெடுக்கப்படும்.
ரியாலை வெல்வது சாதாரணமன்று. எனினும், ரியாலின் சொந்த மண்ணில் அதனுடன் சமநிலை கண்டது சிட்டிக்கு ஊக்குவிப்பாக அமையலாம். அதோடு, இந்தப் பருவம் ஸ்பானிய லீக்கில் ரியால் அவ்வளவு சிறப்பாக விளையாடவில்லை.
நிர்வாகி பெப் கார்டியோலாவின் தலைமையில் இரண்டு ஆண்டுகளுக்கு முன்பு முதல்முறையாக சாம்பியன்ஸ் லீக் இறுதியாட்டத்துக்கு முன்னேறியது சிட்டி. ஆனால் இறுதியாட்டத்தில் செல்சியிடம் தோல்வியடைந்தது.
கடைசியாக 2011ஆம் ஆண்டில் ரியாலின் பரம வைரியான பார்சிலோனாவை சாம்பியன்ஸ் லீக் கிண்ணத்தை வெல்ல வைத்தார் கார்டியாலோ.
அதற்குப் பிறகு ஜெர்மனியின் பயர்ன் மியூனிக், இங்கிலாந்தின் சிட்டி இரண்டுக்கும் அவர் அக்கிண்ணத்தை வென்று தரவில்லை.
இம்முறை நட்சத்திரத் தாக்குதல் ஆட்டக்காரர் எர்லிங் ஹாலண்ட் இருப்பது சிட்டிக்குச் சாத்தியமாக அமையலாம். பொதுவாக பல குழுக்கள் சிரமப்படும் பருவத்தின் இறுதிக் கட்டத்தில் சிட்டி அபாரமாக ஆடி வருகிறது.