அமெரிக்க வெளியுறவு அமைச்சர் ஆண்டனி பிளிங்கன், சீனாவுக்கு இரு நாள் பயணம் மேற்கொண்டு இருக்கிறார். அவர் நேற்று பெய்ஜிங்கில் சீன வெளியுறவு அமைச்சர் சின் காங்கை சந்தித்தார்.
ஐந்தாண்டுகளுக்குப் பிறகு அமெரிக்க அமைச்சர் ஒருவரின் சீனப் பயணம் இப்போது இடம்பெறுகிறது.
அமெரிக்காவுக்கும் சீனாவுக்கும் இடையிலான உறவுகள் மிக பதற்றமாக இருக்கின்றன.
அந்த உறவை நிலைப்படுத்தும் நோக்கத்தில் பேச்சுவார்த்தை நடத்துவதே அமெரிக்க அமைச்சர் மேற்கொண்டுள்ள சீனப் பயணத்தின் நோக்கம் என அமெரிக்க தரப்பில் தெரிவிக்கப்பட்டது.
திரு பிளிங்கன் ஐந்து மாதங்களுக்கு முன்பாக சீனப் பயணத்தை மேற்கொள்ளவிருந்தார். ஆனால் அமெரிக்க ஆகாய வெளியில் சீனா வேவு பலூனை பறக்கவிட்டதாகச் சந்தேகம் கிளம்பியதை அடுத்து அந்தப் பயணம் ஒத்திவைக்கப்பட்டது.
திரு பிளிங்கன் வருகை மூலம் ஏற்படக்கூடிய சாதகமான எதிர்பார்ப்புகளை அமெரிக்கா குறைத்துக்கொண்டு உள்ளன.
பெரிய அளவில் முன்னேற்றம் எதுவும் ஏற்படும் என தான் எதிர்பார்க்கவில்லை என அமெரிக்கா தெளிவுபடுத்தி இருக்கிறது.
உறவுகளை நிலைப்படுத்தவும் தகவல் தொடர்புகளுக்கான வழிகளை திறந்துவிடவும் திரு பிளிங்கன் சீனப் பயணம் மேற்கொண்டுள்ளதாக அமெரிக்க தரப்பில் தெரிவிக்கப்பட்டது.