பிரைட்டன்: இங்கிலிஷ் பிரிமியர் லீக் காற்பந்தாட்டத்தில் எதிர்பாரா விதமாக பிரைட்டனை வென்றுள்ளது வெஸ்ட் ஹேம் யுனைடெட். 3-1 எனும் கோல் கணக்கில் வெஸ்ட் ஹேம் வெற்றி பெற்றது.
சென்ற பருவத்தில் சிறப்பாக விளையாடியது மட்டுமின்றி இப்பருவத்தை அபாரமாகத் தொடங்கியிருந்தது பிரைட்டன். அப்படிப்பட்ட குழுவுக்கு எதிராக வெஸ்ட் ஹேம் தடுமாறக்கூடும் என்று கருதப்பட்டது.
அதற்கு மாறாக மிகச் சிறப்பாக விளையாடி பிரைட்டனைத் திக்குமுக்காடச் செய்தது வெஸ்ட் ஹேம்.
ஆட்டத்தின் 19வது நிமிடத்தில் வெஸ்ட் ஹேமை முன்னுக்கு அனுப்பினார் ஜேம்ஸ் வார்ட் பிரவுஸ். 58வது நிமிடத்தில் ஜேரட் போவன் கோல் எண்ணிக்கையை இரட்டிப்பாக்கினார். 63வது நிமிடத்தில் வெஸ்ட் ஹேமின் மூன்றாவது கோலைப் போட்டார் மிக்காய்ல் என்டோனியோ. 81வது நிமிடத்தில் பாஸ்கல் கிரோஸ் பிரைட்டனுக்கு ஆறுதல் கோலைப் போட்டார்.
சென்ற வாரம் செல்சியை வென்று அசத்திய வெஸ்ட் ஹேம் தனது ரசிகர்களுக்குத் தொடர்ந்து இன்ப அதிர்ச்சியை அளித்து வருகிறது.