மாணவர் முரசு
இ-பேப்பர்
தமிழ்த் திரையுலகில் மீண்டும் நகைச்சுவை நடிகர்களின் ஆதிக்கம் அதிகரித்துள்ளது. அவர்களில் சிலர் கதாநாயகர்களாகவும் உயர்ந்துள்ளனர்.
சந்தானம், யோகி பாபு, முனீஸ்காந்த், காளிவெங்கட், கருணாகரன் என்று கதாநாயகர்களாக மாறிய நகைச்சுவை நடிகர்களின் பட்டியல் நீளமாகிக்கொண்டே போகிறது.
தற்போது ஆர்.ஜே.பாலாஜி போன்ற அடுத்த வரிசை நகைச்சுவை நடிகர்களும் கதாநாயகர்களாக மாறி உள்ளனர். ஆர்.ஜே.பாலாஜி அடுத்தக்கட்டமாக பட இயக்குநராகவும் மாறி உள்ளார்.
வடிவேலு, விவேக் காலகட்டத்திற்குப் பிறகு சந்தானம் தவிர்க்க முடியாத நகைச்சுவை நடிகராக வலம் வந்தார். புகழின் உச்சியில் இருக்கும்போதே அவருக்கு கதை நாயகனாக நடிக்கும் வாய்ப்பு தேடி வந்தது.
அவரும் அதைச் சரியாக பயன் படுத்தி தன்னை வணிக நாயகனாக நிலைநிறுத்திக் கொண்டுள்ளார்.
யோகி பாபுவுக்கும் நாயகனாக நடிக்க ரசிகர்களின் ஆதரவு உள்ளது. `தர்ம பிரபு’, `கூர்கா’, `பொம்மை நாயகி’, ‘ மண்டேலா’ என அவர் நாயகனாக நடித்த படங்கள் வெற்றி பெற்றுள்ளன.
தற்போது `பூமர்அங்கிள்’, `லக்கி மேன்’ உள்பட பல படங்களில் கதாநாயகனாக நடித்து வருகிறார் யோகி.
சின்னத்திரை மூலம் பிரபலமான புகழ் `துடிக்கிறது மீசை’ உட்பட இரண்டு படங்களில் நாயகனாக நடிக்கிறார். `முண்டாசுப்பட்டி’ படத்தில் அறிமுகமாகி நகைச்சுவை வேடங்களில் நடித்து வந்த முனீஸ்காந்துக்கும் நாயகனாக நடிக்க வாய்ப்புகள் தேடிவருகின்றன. அண்மையில்கூட `காடப்புறா கலைக்குழு’ என்ற படத்தில் நாயகனாக நடித்திருந்தார்.
தொடர்புடைய செய்திகள்
குணச்சித்திர நடிப்புக்குப் பெயர்பெற்றவர் காளி வெங்கட். கனமான, அழுத்தமான கதைகளில் நாயகனாக நடித்து அசத்தி வருகிறார். அவரது நடிப்பில் அண்மையில் வெளியான `கார்கி’ படம் நல்ல வரவேற்பைப் பெற்றுள்ளது.
“நகைச்சுவை நடிகர்கள் கதை நாயகர்களாக நடிப்பதை ரசிகர்கள் வரவேற்றுள்ளனர். இவர்கள் நடிக்கும் படங்கள் வசூல் ரீதியில் வெற்றிபெற்று வருகின்றன.
“மேலும், அதிக சம்பளம் கேட்காமல் இருப்பதால் தயாரிப்பாளர்களால் குறைந்த செலவில் படங்களைத் தயாரிக்க முடிகிறது. தயாரிப்பாளர்கள் பாதுகாப்பாக முதலீடு செய்வதாகக் கருதுகின்றனர். இது திரையுலக வளர்ச்சிக்கு கைகொடுக்கும்,” என்கிறார்கள் திரையுலக விவரப் புள்ளிகள்.
ஆர்.ஜே.பாலாஜி அடுத்தடுத்து வெற்றிப் படங்களில் நாயகனாக நடித்ததை அடுத்து, அவரது மதிப்பும் ஊதியமும் உயர்ந்துள்ளது. சந்தானம் நடிப்பில் வெளியான அண்மைய படங்களும் நல்ல வசூல் கண்டுள்ளதால் அவரது ஊதியமும் உயர்ந்துள்ளது.
“நல்ல கதைகள் அமையும் பட்சத்தில் நகைச்சுவை நடிகர்களையும் கதாநாயகர்களாகத்தான் கருத வேண்டும். ரசிகர்கள் இத்தகைய முடிவில்தான் இருக்கின்றனர்,” என்றும் விவரமறிந்தவர்கள் கூறுகின்றனர்.