மாணவர் முரசு
இ-பேப்பர்
ஒவ்வொரு வாரமும் சிங்கப்பூரில் இருக்கும் குறிப்பிட்ட சில திறந்தவெளிகளில் இந்தியக் குடும்பங்கள் சில ஒன்றுகூடி ஒரு தனித்துவமான பொழுதுபோக்கில் ஈடுபட்டு வருகின்றன.
காண்போரைக் கவர்ந்திழுக்கும்படியான வண்ணமிகு சிறகுகளுடன் கூடிய மக்காவ் கிளிகளை வானில் பறக்கவிட்டு அவர்கள் இன்பமடைகின்றனர்.
மக்காவ் கிளிகள் வண்ணமயமான நீண்ட வால் கொண்ட கிளிகள். அவை பஞ்சவர்ணக் கிளிகள் என்றும் அழைக்கப்படுகின்றன.
பல ஆண்டுகளாக இந்தப் பொழுதுபோக்கில் ஈடுபட்டு வரும் அக்குடும்பங்கள், அண்மையில் ‘விங்டு வாரியர்ஸ்’ எனும் ஒரு குழுவை உருவாக்கி இந்தியக் குடும்பங்களை அதில் ஈடுபட ஊக்குவித்து வருகின்றன.
மிஷெல் யோகேஸ்வரி, 37 - தனபாலன், 43, இணையர் ஒரு பிள்ளையை வளர்ப்பதுபோல தங்களின் இரு மக்காவ் கிளிகளைக் கண்ணும் கருத்துமாக வளர்த்துவருவதோடு, அவற்றைப் பறக்க விடுவதிலும் முழுமூச்சாக ஈடுபட்டு வருகின்றனர்.
ஸ்டோர்மி, தண்டர் எனும் அந்த இரு மக்காவ் கிளிகளும் இவர்களின் வாழ்வில் மட்டுமின்றி அவர்களின் நான்கு வயது மகள் பீட்ரைஸ் ஃபோக் இஷானா வாழ்விலும் பின்னிப் பிணைந்துள்ளன.
இப்பறவைகளின் சிறகுகளை வெட்டாமல் அவற்றைச் சுதந்திரமாக விடவேண்டுமென்ற முதன்மைக் காரணத்திற்காக இவ்விணையர், தங்களின் மக்காவ் கிளிகளைப் பறக்க விடுகின்றனர்.
குறிப்பிட்ட தொலைவு பறந்ததும் மீண்டும் அக்கிளிகள் தங்கள் உரிமையாளரிடமே திரும்பிவிடுவதுதான் இந்தப் பொழுதுபோக்கின் விந்தை.
தொடர்புடைய செய்திகள்
தெரிந்த பயிற்றுவிப்பாளர் மூலம் இரு கிளிகளுக்கும் பயிற்சி வழங்கப்பட்டது. மேலும், அவற்றுக்கு மிதமான உணவுப் பழக்கமுறையும் அறிமுகப்படுத்தப்பட்டது.
சுழற்சி முறையில் வேலை செய்யும் தனபாலன், பயிற்சிக் காலத்தில் இரு கிளிகளையும் காலையிலும் மாலையிலும் பறக்கவிட்டு வந்தார்.
கிளிகளை வானில் பறக்கவிடுவது கண்களுக்கு விருந்தளித்தாலும் அதில் சவால்களும் நிறைந்துள்ளன.
குறிப்பாக, கழுகுகளின் பார்வையில் கிளிகள் பட்டுவிட்டால் அது மிகவும் ஆபத்தானது என்று விளக்கினார் மிஷெல்.
கிளிகளின் மேல் அடையாள முத்திரை வைக்கப்படும் என்றும் அவை பறக்கும்போது காணாமல் போனாலும் கிளிகள் செயலி மூலம் கண்காணிக்கப்படும் என்றும் அவர் தெரிவித்தார்.
“சில நேரங்களில் கிளி மரத்தில் ஏறி அமர்ந்துவிடும். அப்போது நாங்கள் விளையாட்டுப் பொருளை எடுத்து கிளை மீது வீசினால் அந்த சத்தத்தைக் கேட்டு கிளி எங்களை நோக்கிப் பறந்துவரும்,” என்று கூறினார் தனபாலன்.
தனபாலன் எண்ணெய் எரிவாயுத் துறையிலும், மிஷெல் வங்கியியல் துறையிலும் பணியாற்றி வருகின்றனர்.
பரபரப்பான வாழ்க்கைச் சூழலுக்கு இடையிலும் இருவரும் நேரம் தவறாமல் கிளிகளுக்கு உணவு ஊட்டவும் அவற்றுடன் நேரம் செலவிடவும் தவறுவதில்லை.
மக்காவ் கிளிகள் உரத்த சத்தம் எழுப்புவதற்குப் பெயர்போன கிளிகள். வீவக வீட்டில் வசித்து வரும் இவ்விணையர், சில நேரங்களில் கிளிகள் சத்தம் போடுவது அண்டை வீட்டாருக்குத் தொந்தரவாக இருந்தாலும் அவர்கள் ஒத்துழைத்து வருவதாகத் தெரிவித்தனர்.
மிஷெல் இளவயதிலிருந்தே பறவைகளை வளர்த்து வந்துள்ளார். ஆனால், தனபாலனுக்கு இதுவே முதன்முறை அனுபவம்.
“தொடக்கத்தில் எனக்கு வீட்டில் பறவைகளை வளர்க்க விருப்பமில்லை. அந்தக் கிளிகள் கத்தியபோதெல்லாம் நான் பதற்றமடைந்தேன். மனைவியின் ஊக்குவிப்பில் இப்போது கிளிகளை என் குழந்தைகள் போல கவனித்துக் கொள்கிறேன்,” என்கிறார் தனபாலன்.
கிளிகளைக் குளிப்பாட்டி, அவற்றை நீண்ட நேரம் வெயிலில் வைத்தால் சிறகுகள் நன்றாக வளரும் என்ற மிஷெல், தஞ்சோங் ரூ, காலாங், மரினா பே ஆகிய இடங்களில் கிளிகளைப் பறக்கவிடுவதாகச் சொன்னார்.
இவர்களுடன் ராஜ்காந்த், 34 - பிரியலோஷினி, 34, இணையரும் சேர்ந்து, தங்களின் மக்காவ் கிளியைப் பறக்கவிட்டு வருகின்றனர். தங்களின் இரு பிள்ளைகளையும் அழைத்து வரும் அவர்கள், இன்றைய சூழலில் வெளிப்புறப் பொழுதுபோக்கில் பிள்ளைகளை ஈடுபட வைப்பது நல்லது என்கின்றனர்.
அதுபோல, தனபாலனும் மிஷெலும் இதர குடும்பங்களுடன் இணைந்து இதில் ஈடுபடுவது ஒரு நல்ல பிணைப்பை உருவாக்குவதாகக் கூறினர்.
“பிள்ளைகளை மின்னணுக் கருவிகளில் மூழ்கடிப்பதைவிட இயற்கையுடன் ஒன்றச்செய்வது சிறந்தது,” என்றார் தனபாலன்.