மாணவர் முரசு
இ-பேப்பர்
தமிழ்மொழிவிழா 2023ன் ஓர் அங்கமாக தமிழ்ப் பட்டிமன்றக் கலைக் கழகத்தின் பட்டிமன்ற நிகழ்ச்சி ஏப்ரல் 29ஆம் தேதி கியட் ஹாங் சமூக மன்றத்தில் நடைபெற்றது.
'திரைப்படப் பாடல்களின் அழகு பொருளிலா? இசையிலா?' என்ற தலைப்பிலான விவாதத்தில் பொருளில்தான் என்ற அணியை தொகுப்பாளினி மற்றும் பிக்பாஸ் நட்சத்திரம் அனிதா சம்பத் தலைமை ஏற்க, மாணவர்கள் முத்துக்குமார் மகிஷா, அஸ்வின் கணேசன் அணிக்கு வலிமை சேர்த்தனர்.
செந்தமிழ்த் தேன்மொழியாள் காலம் முதல் இன்றைய காலகட்டம் வரை திரைப்படப் பாடல்கள் பொருளுக்காகத்தான் வெகுவாக ரசிக்கப்படுகிறது என்றும் பாடல்கள் பொருள்நயத்துடன் இருக்கவேண்டுமென்பதற்காகவே திரைப்படத் தாயாரிப்பாளர்கள் கவிஞர் கண்ணதாசன், வாலி, வைரமுத்து போன்ற திரைப்படக் கவிஞர்களின் பாடல்கள் இடம்பெற விரும்புகிறார்கள் என்றும் வாதிட்டனர். இசை மட்டும் இருந்தால் அது அவ்வளவாக ரசிக்கப்படாது என்றனர் அவர்கள்.
இசையில்தான் என்ற அணியை நடிகரும் இயக்குநருமான பாண்டியராஜன் தலைமை ஏற்க, மாணவிகள் தக்ஷினி முத்துகுமார், முத்துசுவேதா வாதிட்டனர். திரு பாண்டியராஜன் பேசும்போது தன் திரையுலக அனுபவங்களை மையப்படுத்தி தன் அணிக்கு வலிமை சேர்த்தார். தன் சொந்தப்படமான ஆண்பாவத்தில் ஒரு காட்சி இளையராஜாவின் இசையால் மட்டுமே உயிரூட்டப்பட்டதாகச் சொன்னார்.
ஒரு காட்சியின் பிரம்மாண்டத்தை பின்னணி இசையால்தான் காட்டமுடியும் என்றும் காட்சியை பார்ப்பவர்களை உடனே அந்தக் காட்சியோடு கரையவைப்பது இசைதான் என்றும் அந்த இடத்தில் பொருளைத் தேடிக்கொண்டு இருக்கமாட்டார்கள் என்றும் வாதிட்டனர். பொருளே இல்லாத பாடல்கூட இசையால் வெற்றிபெறலாம். ஆனால் இசையே இல்லாத பாடல் எவ்வளவு பொருளுள்ள பாடலாக இருந்தாலும் ரசிக்கப்படாது என்றும் வாதிட்டனர்.
இரு அணியின் வாதங்களையும் ஆராய்ந்து தன் கருத்தை எடுத்துவைத்தார் நடுவர் நெல்லை சுப்பையா. "திரைப்படப் பாடல்களின் அழகு இசையில்தான்," என்றார் அவர்.
செய்தி, படம்: தமிழ்ப் பட்டிமன்றக் கலைக் கழகம்