நடிகர் நானா படேக்கர் மறைவு: கோவா காவல்துறை வழக்குப்பதிவு

பனாஜி: இந்தியத் திரையுலகின் பிரபல மூத்த நடிகரான நானா படேக்கர் (75), கோவாவில் உள்ள தனது இல்லத்தில் ஏற்பட்ட மாரடைப்பு காரணமாகக் காலமானார்.

அவரது மறைவைத் தொடர்ந்து கோவா காவல்துறை ‘இயற்கைக்கு மாறான மரணம்’ என வழக்குப் பதிவு செய்து விசாரணையைத் தொடங்கியுள்ளது.

தோனா பௌலாவில் உள்ள இல்லத்தில் தனியாக இருந்தபோது நானா படேக்கருக்கு திடீரென உடல்நலக்குறைவு ஏற்பட்டது. உடனடியாக பாம்போலிமில் உள்ள மணிப்பால் மருத்துவமனைக்கு அழைத்துச் செல்லப்பட்டபோதிலும், அவர் ஏற்கெனவே இறந்துவிட்டதாக மருத்துவர்கள் தெரிவித்தனர்.

வீட்டில் தனியாக இருந்தபோது உயிரிழந்ததாலும் மருத்துவமனையின் மருத்துவச் சட்டநடைமுறைகளின் அடிப்படையிலும் வழக்கமான நடைமுறையாகவே இந்த வழக்குப் பதிவு செய்யப்பட்டுள்ளதாகப் பனாஜி காவல்துறை விளக்கியுள்ளது.

ஏதேனும் சந்தேகத்துக்குரிய அம்சங்கள் உள்ளதா என்பதைத் தீர்க்கவே இந்த நடவடிக்கை எடுக்கப்பட்டுள்ளதாகக் காவல் உதவி ஆய்வாளர் நிதின் நாயக் தலைமையிலான புலனாய்வுக் குழு தெரிவித்துள்ளது.

இதனிடையே, நானா படேக்கரின் உடல் கோவாவிலிருந்து மகாராஷ்டிர மாநிலம் புனேவில் உள்ள அவரது தொஞ்சே பண்ணை வீட்டிற்கு எடுத்துச் செல்லப்பட்டு, அரசு மரியாதையுடன் தகனம் செய்யப்பட்டது. திரையுலகப் பிரபலங்கள், முக்கியத் தலைவர்கள், ஆயிரக்கணக்கான ரசிகர்கள் அவருக்கு அஞ்சலி செலுத்தினர்.