உலகின் மூன்றாவது ஆகப் பெரிய பொருளியலாக இந்தியா உருவெடுக்கலாம்

புதுடெல்லி: உலகின் ஐந்தாவது ஆகப் பெரிய பொருளியலாக இருக்கும் இந்தியா, கடந்த 10 ஆண்டு காலத்தில் 105 விழுக்காடு பொருளியல் வளர்ச்சியைக் கண்டுள்ளதாக அனைத்துலக நாணய நிதியத்தின் அறிக்கையில் குறிப்பிடப்பட்டுள்ளது.

நாட்டின் மொத்த உள்நாட்டு உற்பத்தி, 2015ஆம் ஆண்டில் 2.1 டிரில்லியன் டாலராக (2.8 டிரில்லியன் வெள்ளி) இருந்த நிலையில், தற்போது இருமடங்காக அதிகரித்து இவ்வாண்டு 4.3 டிரில்லியன் டாலருக்கு உயர்ந்துள்ளது. தற்போது, ஜப்பானின் மொத்த உள்நாட்டு உற்பத்தியில் பெரிய அளவில் மாற்றம் இல்லாததால் 2024-25 நிதியாண்டின் மூன்றாவது காலாண்டில் இந்தியா, ஜப்பானைப் பின்னுக்குத் தள்ளி உலகின் நான்காவது பெரிய பொருளியலாக உருவெடுக்கும் வாய்ப்புகள் தலைதூக்கியுள்ளன.

வரும் 2027ஆம் ஆண்டு ஜெர்மனியைப் பின்னுக்குத் தள்ளி உலகின் மூன்றாவது ஆகப் பெரிய பொருளியலாகவும் உருவெடுக்கலாம் என்று தெரிவிக்கப்பட்டுள்ளது.

மொத்த உள்நாட்டு உற்பத்தியில் அமெரிக்கா 30.3 டிரில்லியன் டாலருடன் முதலிடத்தில் உள்ளது. தற்போதைய வேகத்தில் ஒவ்வோர் ஒன்றரை ஆண்டுக்கும் இந்தியா அதன் மொத்த உள்நாட்டு உற்பத்தியில் ஒரு டிரில்லியன் டாலரைச் சேர்க்கமுடியும் என்று பொருளியல் நிபுணர்கள் கூறுகின்றனர்.

இந்த வேகம் தொடர்ந்தால், 2032ஆம் ஆண்டிறுதிக்குள் இந்தியா 10 டிரில்லியன் டாலர் பொருளியலாக மாறும் என்று பொருளாதார நிபுணர்கள் கூறுகின்றனர்.