மாணவர் முரசு
இ-பேப்பர்
புதுடெல்லி: எச்1பி விசா கட்டணம் உயர்த்தப்பட்டுள்ளதால் இந்திய இளைஞர்கள் சிலர் தங்களது திருமணத்தை ரத்து செய்து விட்டு அமெரிக்கா திரும்பும் நிலை ஏற்பட்டுள்ளது.
விடுமுறைக்கு நாடு திரும்பிய சிலர் பாதியிலேயே அமெரிக்கா செல்கின்றனர் என்று இந்தியச் செய்திகள் குறிப்பிட்டுள்ளன.
அமெரிக்காவில் எச்1பி விசாவில் பணியாற்றும் பலரும் நவராத்திரியை முன்னிட்டும் திருமணத்துக்காகவும் சொந்த ஊருக்கு வந்துள்ளனர்.
பெயர் சொல்ல விரும்பாத இந்திய மென்பொறியாளர் ஒருவர் தமது நிறுவனத்தில் இருந்து உடனடியாக அமெரிக்கா திரும்பும்படி மின்னஞ்சல் வந்துள்ளதால் திருமணத்தை ரத்து செய்துவிட்டுத் திரும்புவதாக தி இந்து நாளிதழிடம் கூறியுள்ளார்.
இவரைப் போலவே ஏராளமான இந்திய இளையர்களும் இளம்பெண்களும் திருமணத்தை ரத்து செய்துவிட்டு அமெரிக்கா திரும்புவதாக அச்செய்தி குறிப்பிட்டுள்ளது.
அமெரிக்காவில் பணியாற்றும் இந்தியப் பொறியாளர் ஒருவர், “தீபாவளியைக் கொண்டாட இந்தியா செல்லத் திட்டமிட்டு இருந்தேன். இப்போதைய நிலையில் அமெரிக்காவைவிட்டு வெளியேற வேண்டாம் என்று நிறுவன அதிகாரிகள் அறிவுறுத்தியதால், பயணத்தை ரத்து செய்துவிட்டேன்,” என்று தெரிவித்தார்.
அமெரிக்காவில் தற்காலிகமாகப் பணியாற்றுவோருக்கு எச்1பி விசா வழங்கப்படுகிறது. ரூ.1.32 லட்சமாக இருந்த இந்த விசா கட்டணத்தை அமெரிக்க அரசு திடீரென ரூ.88 லட்சமாக உயர்த்தியது. புதிய கட்டண முறை திங்கட்கிழமை (செப்டம்பர் 22) அமலுக்கு வந்தது.
அமெரிக்காவில் எச்1பி விசாவில் ஏறக்குறைய 7.50 லட்சம் பேர் பணியாற்றி வருகின்றனர். அவர்களின் மனைவி, பிள்ளைகள் என 6 லட்சம் பேரும் அமெரிக்காவில் வசிக்கின்றனர். இவர்களில் 75 விழுக்காட்டினர் இந்தியர்கள்.
