ஆசிய பணக்கார குடும்பங்களில் முகேஷ் அம்பானி முதலிடம்

புதுடெல்லி: ஆசிய பணக்கார குடும்பங்களின் பட்டியலை புளூம்பெர்க் நிறுவனம் வெளியிட்டுள்ளது. இதில் முதல் இடத்தில் முகேஷ் அம்பானியின் குடும்பம் உள்ளது. மேலும் முதல் 20 இடங்களில் ஆறு இந்தியர்களின் குடும்பங்கள் இடம்பெற்றுள்ளன.

இந்தப் பட்டியலில் முதலிடத்தில் உள்ள தொழில் அதிபர் முகேஷ் அம்பானி குடும்பத்தின் சொத்தின் மதிப்பு ரூ.7.85 லட்சம் கோடி ஆகும். ரிலையன்ஸ் இண்டஸ்ட்ரீஸ் நிறுவனத்தை முகேஷ் அம்பானி மேற்பார்வையிட்டு வருகிறார்.

நான்காவது இடத்தில் இந்தியாவைச் சேர்ந்த தொழில் அதிபர் மிஸ்திரியின் குடும்பம் உள்ளது. இவர்களின் சொத்து மதிப்பு ரூ.3.25 லட்சம் கோடி ஆகும். இவர்களின் குடும்பம் ஷபூர்ஜி பல்லோன்ஜி குழும நிறுவனங்களை நடத்தி வருகிறது. டாடா சன்ஸ் நிறுவனத்தில் குறிப்பிடத்தக்க பங்குகளை வைத்திருக்கிறது.

இந்தியாவை சேர்ந்த ஜிண்டால் குடும்பம் ஏழாவது இடத்தில் உள்ளது. இந்தக் குடும்பத்தின் சொத்து மதிப்பு ரூ.2.43 லட்சம் கோடி ஆகும். இந்தக் குடும்பம் ஓபி ஜிண்டால் குழும நிறுவனங்களை நடத்தி வருகிறது.

இந்தியாவைச் சேர்ந்த பிர்லா குடும்பம் ஒன்பதாவது இடத்தில் உள்ளது. இந்தக் குடும்பத்தின் சொத்து மதிப்பு ரூ.1.99 லட்சம் கோடி ஆகும். ஏழு தலைமுறைகளாக இந்தக் குடும்பம் உலோகங்கள், சிமெண்ட் மற்றும் நிதி சேவை போன்ற தொழில்களில் ஈடுபட்டு வருகிறது.

13வது இடத்தில் இந்தியாவைச் சேர்ந்த பஜாஜ் குடும்பம் உள்ளது. இவர்களின் சொத்து மதிப்பு ரூ.1.74 லட்சம் கோடி ஆகும். இவர்கள் பஜாஜ் குழும நிறுவனங்களை நடத்தி வருகிறார்கள்.

18வது இடத்தில் இந்தியாவைச் சேர்ந்த இந்துஜா குடும்பம் உள்ளது. இந்தக் குடும்பத்தின் சொத்து மதிப்பு ரூ.1.31 லட்சம் கோடி ஆகும். இந்தக் குடும்பம் இந்துஜா குழும நிறுவனங்களை நடத்தி வருகிறது.