மாணவர் முரசு
இ-பேப்பர்
புதுடெல்லி: தலைநகர் புதுடெல்லி யில் ரூ.1,200 கோடி ($2.4 பில்லியன்) செலவில் கட்டப்பட்டுள்ள மாபெரும் நாடாளுமன்றக் கட்டடம் இன்று அதிகாரபூர்வமாகத் திறக்கப்படுகிறது.
புதிய நாடாளுமன்றக் கட்டடம் முழுக்க இந்திய கட்டடக் கலை பாணியில் முக்கோண வடிவில் உருவாக்கப்பட்டுள்ளது.
மகாராஷ்டிராவின் நாக்பூரிலிருந்து தருவிக்கப்பட்ட தேக்கு மரம், உத்தரப்பிரதேச மிர்சாபூரின் தரை விரிப்புகள், திரிபுராவின் மூங்கில் தரை, ராஜஸ்தானின்கற்சிலை வேலைப்பாடுகளுடன் புதிய நாடாளுமன்றம், இந்தியாவின் துடிப்பான வண்ணங்களையும் பன்முகத்தன்மையையும் பிரதிபலிக்கிறது.
மக்களவை சபாநாயகர் இருக்கை அருகே தமிழகத்தைச் சேர்ந்த திருவாவடுதுறை ஆதீனம் வழங்கிய செங்கோல் நிறுவப்பட உள்ளது.
அந்த செங்கோல் ஆங்கிலேயர்களிடம் இருந்து ஆட்சி அதிகாரம் இந்தியர்களுக்கு பரிமாற்றம் செய்யப்பட்டதன் அடையாளமாக முதல் பிரதமர் நேருவுக்கு வழங்கப்பட்டதாகும்.
அலகாபாத்தில் உள்ள நேரு அருங்காட்சியகத்தில் வைக்கப்பட்டுள்ள வரலாற்றுச் சிறப்புமிக்க அந்த செங்கோல் நாடாளு மன்றத்தை அலங்கரிக்கவிருக்கிறது. பழைய நாடாளுமன்றம் கட்டப்பட்டு 100 ஆண்டுகள் நெருங்கியதால் புதிய நவீன வசதிகள் செய்ய முடியாத நிலையில் புதிய கட்டடம் கட்ட பிரதமர் மோடி முடிவு செய்தார்.
அதன்படி தற்போதைய நாடாளுமன்றக் கட்டடத்திற்கு அருகிலேயே புதிய நாடாளுமன்றம் 64,500 சதுர அடி பரப்பளவில் கட்டப்பட்டுள்ளது.
மக்களவையில் 888 எம்.பி.க் களும், மாநிலங்களவையில் 384 எம்.பி.க்களும் அமரும் வகையில் புதிய நாடாளுமன்றக் கட்டடத்தில் நவீன வசதிகள் செய்யப்பட்டுள்ளன.
அதாவது, ஒரே நேரத்தில் 1,272 எம்.பி.க்கள் அமர்ந்து தங்களது பணிகளை மேற்கொள்ள முடியும்.
இந்த நிலையில் புதிய நாடாளு மன்ற கட்டடத்தை பிரதமர் மோடி இன்று திறந்து வைக்கிறார்.
ஆனால் சாவர்க்கரின் பிறந்த நாளான இன்று புதிய கட்டடத்தை திறந்துவைக்க எதிர்க்கட்சிகள் எதிர்ப்பு தெரிவித்துள்ளன. அதிபர்தான் கட்டடத்தை திறக்க வேண்டும் என்றும் அவை வலியுறுத்துகின்றன.
இதனை மத்திய அரசு ஏற்காததால் காங்கிரஸ், தி.மு.க, கம்யூனிஸ்ட் உள்பட 19 கட்சிகள் திறப்பு விழாவை புறக்கணிக்கப் போவதாக கூட்டாக அறிவித்துள்ளன.
பா.ஜ.க. வின் தோழமை கட்சி களான அ.தி.மு.க., பா.ம.க., த.மா.கா., சிவசேனா கட்சிகள் இதில் பங்கேற்கின்றன. எதிர்க்கட்சிகளில் பிஜூ ஜனதாதளம், தெலுங்கு தேசம், ஒய்.எஸ்.ஆர். காங்கிரஸ், அகாலிதளம் உள்பட பல்வேறு கட்சிகள் கலந்துகொள்கின்றன.