சோர்வுக்கு நீண்ட ஓய்வு தீர்வில்லை

உறங்கி எழுந்தவுடன் காலைக் கடன்களைச் செய்யத் தொடங்குவது நல்லது. மாறாக, கட்டிலில் மல்லாந்து படுத்தபடியே கைப்பேசியில் மூழ்கிவிடுவது ஆக்கபூர்வமாக இருக்காது. 

பகலில் நீண்ட நேரம் படுக்கையில் இருந்தவாறே பயனற்ற நடவடிக்கைகளில் ஈடுபடுவது ‘பெட்ராட்டிங்’ (Bedrotting) எனப்படும். அதாவது, தூங்காமல் விழித்திருக்கும் மந்த நிலையில், படுக்கையிலே மணிக்கணக்காக கைப்பேசி அல்லது தொலைக்காட்சியில் மூழ்கி நேரத்தைக் கழிப்பதாகும். 

பல வேளைகளில் இத்தகைய நீடித்த ஓய்வுக்குப் பின்னே சோர்வும் மனஅழுத்தமும் மறைந்திருக்கும். 

நடைமுறை உலகில் வாழாமல் கற்பனை உலகில்  ஒருவர் இவ்வாறு ‘சிதைந்து’ போவது தனக்குத்தானே செய்துகொள்ளும் தீங்காகும். அமெரிக்காவின் கொலம்பியா கல்லூரி (சிகாகோ) மேற்கொண்ட ஆய்வின்படி, எல்லாவற்றிலிருந்தும் தப்பிக்கும் மனப்பான்மையின் வெளிப்பாடாக இந்தப் பழக்கம் உள்ளது.

மனத்தெளிவுநிலை வல்லுநரும் சிங்கப்பூரின் ‘மைண்ட்ஃபுல்னஸ் சென்டர்’ நிறுவனருமான டாக்டர் கதிரேசன் கே, “ஓய்வெடுப்பதில் தவறில்லை. ஆனால், வரம்பற்ற ஓய்வு, தீய பழக்கமாக மாறும்போது, நமது முழுமையை நாம் இழக்கிறோம்,” என்று கூறினார். 

எப்போதும் பயனுள்ள நடவடிக்கைகளைத் தொடர்ந்து செய்வதும் சாத்தியமன்று என்றார் ரிபப்ளிக் பலதுறைத் தொழிற்கல்லூரி மாணவி ஆனந்தராஜ் ஏஞ்சலிட்டா ஷெரின், 18.

“படுத்துக்கிடப்பதைச் சோம்பேறித்தனம் என்றும் ஒரேயடியாகச் சொல்ல முடியாது. இந்த இளைப்பாறுதல் மன அமைதிக்கு முக்கியம் என நினைக்கிறேன்,” என்றும் அவர் கூறினார். 

பள்ளி, வேலை, குடும்பம் என்று வாழ்க்கையின் வேகம் சில நேரங்களில் தாங்க முடியாத அளவுக்குச் சுமையாக மாறுகிறது. அதற்காக எதையும் செய்யாமல் படுக்கையில் கிடப்பது தீர்வாகாது என்கிறார் டாக்டர் கதிரேசன்.

தொடர்புடைய செய்திகள்

சமூக ஊடகங்களில் வன்முறை; தற்காத்துக்கொள்ள வழிமுறை

மனநலத்தை வலியுறுத்திய இருநாள் விழா

“‘பெட்ராட்டிங்’ பழக்கத்திலிருந்து விடுபடுவதற்கு முதலில் நம்மையே நாம் உண்மையான அன்புடன் நடத்துவது முக்கியம். விழிப்புணர்வை அதிகரிக்க மூச்சுப்பயிற்சி, இலகுவான உடற்பயிற்சி போன்றவற்றில் ஈடுபடுவது மனத்திற்குப் புத்துணர்ச்சியையும் நிம்மதியையும் அளிக்கும்,”  என்று அவர் குறிப்பிட்டார்.