மாணவர் முரசு
இ-பேப்பர்
கடைத்தொகுதிகள், சமூக நிறுவனங்கள் என ஏழு இடங்களில் புதிய ‘சிட்-என்-ரீட் நோட்ஸ்’ (Sit-n-Read Nodes) எனப்படும் வாசிப்பு முனைகளைத் தேசிய நூலக வாரியம் அறிமுகப்படுத்தியுள்ளது.
இந்த முன்முயற்சியின் மூலம், பொதுமக்கள் உடனடியாக வாசிப்பதற்காக 3,000க்கும் மேற்பட்ட புத்தகங்கள் வழங்கப்படுகின்றன.
இந்த முனைகள் தற்சேவை முறையில் செயல்படுகின்றன. இருக்கும் இடத்தைப் பொறுத்து சில மாதங்கள் முதல் ஓராண்டுவரை அந்த வாசிப்பு முனைகள் திறந்திருக்கும்.
இங்குள்ள சிறப்பம்சம் என்னவெனில், வாசகர்கள் புத்தகங்களை இரவல் பெறாமல் இலவசமாக எடுத்து வாசிக்கலாம். மேலும், வாசித்து முடித்தவுடன் மற்றவர்களும் அவற்றைப் படிக்க ஏதுவாக நூல்களைத் திரும்ப வைக்குமாறு கேட்டுக்கொள்ளப்படுகின்றனர்.
அங் மோ கியோ ஹப், மார்கரெட் மார்க்கெட், சாஃப்ரா பொங்கோல், சாஃப்ரா ஈசூன், நகர மறுசீரமைப்பு ஆணையத்திலுள்ள ‘தி கஃபீன் எக்ஸ்பீரியன்ஸ்’, ‘தி சென்டர்பாய்ன்ட்’, ‘தி ஸ்டார் விஸ்டா’ ஆகிய இடங்களில் அமைந்துள்ள ஒவ்வொரு முனையிலும் பெரியவர்களுக்கும் குழந்தைகளுக்குமான புனைகதை, புனைகதை அல்லாத கிட்டத்தட்ட 400 புத்தகங்கள் வைக்கப்பட்டுள்ளன.
அங் மோ கியோ ஹப், சாஃப்ரா பொங்கோல், சாஃப்ரா ஈசூன், தி சென்டர்பாய்ன்ட், தி ஸ்டார் விஸ்டா உட்பட தேர்ந்தெடுக்கப்பட்ட இடங்களில் சீன, மலாய், தமிழ் நூல்களும் வழங்கப்படுகின்றன.
“இந்த வாசிப்பு முனைகள், வாசிப்பை ஊக்குவிப்பது மட்டுமின்றி, எங்களிடம் நல்ல நிலையில் உள்ள பழைய புத்தகங்களுக்கு ஒரு புதிய வாழ்வை அளிப்பதையும் முக்கிய நோக்கமாகக் கொண்டுள்ளது.
“மக்கள் இந்தப் புத்தகங்களைச் சொந்தமாக வைத்துக்கொள்ளாமல், வாசித்து, மற்றவர்களுடன் பகிர்ந்துகொள்ளவேண்டும். அத்துடன், இம்முயற்சி வெவ்வேறு இடங்களிலுள்ள பல்வேறு சமூகங்களைச் சென்றடைய வேண்டும் என்று நாங்கள் விரும்புகிறோம்,” என்றார் தேசிய நூலக வாரியத்தின் திட்டமிடல், மேம்பாட்டுப் பிரிவின் மேலாளர் லாவண்யா கிருஷ்ணமூர்த்தி, 40.
தொடர்புடைய செய்திகள்
இந்த முயற்சி, அன்றாடச் சூழல்களிலும் வாசிப்பை வழக்கமாக்குவதை இலக்காகக் கொண்ட ‘நூலகங்கள், ஆவணங்கள் வரைவுத் திட்டத்தை’ ஆதரிப்பதாகவும் அவர் குறிப்பிட்டார்.
தேசிய நூலக வாரியத்தின் விரிவான தொகுப்பிலிருந்து, நல்ல நிலையில் உள்ள பழைய புத்தகங்கள் இந்த வாசிப்பு முனைகளுக்காகத் தேர்ந்தெடுக்கப்பட்டுள்ளன.
வாசகர்களின் ரசனைக்கு ஏற்ப புனைகதை, புனைகதை அல்லாதவை, பெரியவர்கள், குழந்தைகளுக்கான புத்தகங்களைச் சேர்த்துக் கவனமாகத் தேர்ந்தெடுப்பதாக லாவண்யா விளக்கினார்.
இந்த அனுபவத்தை மேலும் மேம்படுத்த, பெரும்பாலான முனைகளில் உள்ள மின்வாசிப்பு (eReads) மின்னிலக்கத் திரைகள், சஞ்சிகை முனை (MagNode) காட்சித் திரைகள் மூலம் தேர்ந்தெடுக்கப்பட்ட மின்னூல்கள், மின்னிதழ்கள் முதலியவற்றை வாசகர்கள் அணுகலாம்.
மேலும், வாரியத்தின் நிலைத்தன்மை முயற்சிகளின் ஒரு பகுதியாக, இந்த முனைகளில் இடம்பெறும் சில பொருள்கள் மறுபயனீடு செய்யப்பட்டவை என்பது குறிப்பிடத்தக்கது.
2025 ஆகஸ்ட் முதல் படிப்படியாகத் திறக்கப்பட்ட இந்த வாசிப்பு முனைகள் இதுவரை 25,000க்கும் மேற்பட்ட வாசகர்களை வரவேற்றுள்ளன.
இந்தப் பெருவரவேற்பு, சிங்கப்பூர் முழுவதும் வாசிப்பை எளிதில் அணுகக்கூடியதாகவும், சுவாரசியமானதாகவும், அன்றாட வாழ்க்கையின் ஒரு பகுதியாகவும் மாற்றுவதற்கான தேசிய நூலக வாரியத்தின் தொலைநோக்குப் பார்வையை மேலும் விரிவுபடுத்துகிறது.