மாணவர் முரசு
இ-பேப்பர்
வில்லேஜ் ஹோட்டல் செந்தோசாவில் தங்கிய ஒருவர், திருட்டு நடந்ததாக வெள்ளிக்கிழமை (அக்டோபர் 17) புகார் அளித்ததைத் தொடர்ந்து, காவல்துறை விசாரணைகளுக்கு அந்த ஹோட்டல் உதவி வருகிறது.
இதுகுறித்து ஸ்ட்ரெய்ட்ஸ் டைம்ஸ் எழுப்பிய கேள்விகளுக்குப் பதிலளித்த காவல்துறை, வெள்ளிக்கிழமை பிற்பகல் 1.35 மணியளவில் எண் 10 ஆர்ட்டிலரி அவென்யூவில் உதவி கோரி அழைப்பு கிடைத்ததாக ஞாயிற்றுக்கிழமை தெரிவித்தது.
திருடிய குற்றம் தொடர்பாக 34 வயது பெண்ணிடம் விசாரணை நடத்தப்பட்டு வருவதாகக் காவல்துறை கூறியது.
ஹோட்டலில் தங்கியவர், வெள்ளிக்கிழமை மாலை 4.15 மணியளவில் ‘திரெட்ஸ்’ சமூக ஊடகத் தளத்தில் சீன மொழியில் ஒரு பதிவை வெளியிட்டிருந்தார். ஹோட்டல் அறை பராமரிப்பு ஊழியர் ஒருவர் வெள்ளிக்கிழமை $3,000 ரொக்கத்தை திருடியதாக அந்த ஹோட்டல் விருந்தினர் அப்பதிவில் குறிப்பிட்டிருந்தார்.
வியாழக்கிழமை இரவு தமது ஹோட்டல் அறையில் இருந்த ஒரு பிளாஸ்டிக் பையில் ஏறத்தாழ $3,000 பணத்தை விட்டுச் சென்றதாகவும் பின்னர் ‘யூனிவர்சல் ஸ்டுடியோஸ் சிங்கப்பூர்’ கேளிக்கைப் பூங்காவுக்கு தாம் சென்றுவிட்டதாகவும் அந்த விருந்தினர் அப்பதிவில் குறிப்பிட்டிருந்தார்.
அந்தப் பையில் இருந்த பணம் வெள்ளிக்கிழமை திருடப்பட்டதாக அவர் கூறினார்.
இந்நிலையில், வில்லேஜ் ஹோட்டல் செந்தோசாவை நடத்திவரும் ‘ஃபார் ஈஸ்ட் ஹாஸ்பிட்டேலிட்டி’ நிறுவனத்தின் பேச்சாளர் ஒருவர் ஊடகங்களின் கேள்விகளுக்கு திங்கட்கிழமை பதிலளித்தார். ஹோட்டலில் விருந்தினர் ஒருவருக்கு வெள்ளிக்கிழமை நடந்த சம்பவம் குறித்து நிறுவனத்துக்குத் தெரியும் என்று அவர் கூறினார்.
வியாழக்கிழமை பிற்பகல் 12.48 மணியளவில் அந்த விருந்தினர் ஹோட்டலில் தங்க வந்ததாகவும் வெள்ளிக்கிழமை காலை 11.15 மணியளவில் வெளியேறியதாகவும் ஹோட்டலின் விசாரணை காட்டுவதாக அந்தப் பேச்சாளர் தெரிவித்தார்.
தொடர்புடைய செய்திகள்
வெள்ளிக்கிழமை பிற்பகல் 12.47 மணியளவில் அந்த விருந்தினர் ஹோட்டலைத் தொடர்புகொண்டு, $3,000 அடங்கிய உறையை தமது அறையில் தாம் விட்டுச் சென்றுவிட்டதாகக் கூறியதாக அந்தப் பேச்சாளர் சொன்னார்.
அறையிலும் அதைச் சுற்றியுள்ள பகுதிகளிலும் ஹோட்டல் ஊழியர்களிடமும் உடனடியாகத் சோதனை நடத்தப்பட்டது என்றும் காணாமல் போனதாகக் கூறப்படும் பணம் ஹோட்டல் ஊழியர்களிடமோ ஹோட்டல் வளாகத்திலோ கண்டுபிடிக்கப்படவில்லை என்றும் அந்தப் பேச்சாளர் கூறினார்.
பிற்பகல் 1 மணிக்குமேல் அந்த விருந்தினர் ஹோட்டலுக்குத் திரும்பியபோது, அவர் முன்னிலையில் இரண்டாவது சோதனை நடத்தப்பட்டது என்றும் காணாமல் போனதாகக் கூறப்படும் பணம் அப்போதும் கண்டுபிடிக்கப்படவில்லை என்றும் அந்தப் பேச்சாளர் சொன்னார்.
காவல்துறையிடம் புகார் அளிக்கப்பட்ட பிறகு, பிற்பகல் 2 மணிக்கும் மாலை 6.32 மணிக்கும் காவல்துறை ஹோட்டலில் சோதனை நடத்தப்பட்டதாகவும் அந்தப் பேச்சாளர் தெரிவித்தார்.
அதிகாரிகளுக்கு ஹோட்டல் முழுமையாக ஒத்துழைத்து வருவதாகவும் நடந்துவரும் செயல்முறைக்கு ஆதரவளிக்கும் வகையில் அந்த விருந்தினருடன் ஹோட்டல் தொடர்பில் இருப்பதாகவும் அந்தப் பேச்சாளர் மேலும் கூறினார்.